जपानमध्ये ६.२ तीव्रतेचा भूकंप!

6.2 magnitude earthquake in Japan जपानमधील होक्काइडो बेटावर सोमवारी पहाटे जोरदार भूकंपाचे धक्के जाणवले. जपान हवामान संस्थेच्या माहितीनुसार, २७ एप्रिल रोजी स्थानिक वेळेनुसार सकाळी साधारण पावणे सहा वाजण्याच्या सुमारास उत्तर होक्काइडोतील तोकाची भागात हा भूकंप झाला. सुरुवातीला त्याची तीव्रता ६.१ इतकी नोंदवली गेली होती, मात्र नंतर सुधारित आकडेवारीनुसार ती ६.२ इतकी असल्याचे स्पष्ट झाले. या भूकंपाचा केंद्रबिंदू जमिनीखाली सुमारे ८३ किलोमीटर खोलीवर असल्याचे सांगण्यात आले आहे.

 

 

 

जपानच्या सात स्तरांच्या भूकंप मापन पद्धतीत या धक्क्यांची तीव्रता पाच इतकी नोंदवली गेली. या पातळीवर लोकांना उभे राहणे किंवा आधाराशिवाय चालणे कठीण होते. सुदैवाने, या घटनेत अद्याप कोणतीही जीवितहानी किंवा मोठे नुकसान झाल्याची माहिती समोर आलेली नाही.भूकंपानंतर खबरदारीचा उपाय म्हणून काही स्थानिक रेल्वे मार्ग तात्पुरते थांबवण्यात आले, विशेषतः पॅसिफिक किनारपट्टीवरील मार्गांवर परिणाम झाला. मात्र होक्काइडो शिंकान्सेन वेगवान रेल्वे सेवा सुरळीत सुरू असल्याचे अधिकाऱ्यांनी स्पष्ट केले. तसेच होक्काइडो इलेक्ट्रिक वीज कंपनीने तोमारी अणुऊर्जा प्रकल्पात कोणतीही असामान्य घटना घडलेली नसल्याचे सांगितले.

 

दरम्यान, याच भागात आठवडाभरापूर्वी ईशान्य जपानमधील आओमोरी प्रदेशात झालेल्या तीव्र भूकंपाच्या पार्श्वभूमीवर हा धक्का बसला आहे. त्या घटनेनंतर संबंधित भागांसाठी सतर्कतेचा इशारा देण्यात आला होता. जपानच्या पंतप्रधान सनाए ताकाइची यांनी जनतेला सावध राहण्याचे आवाहन करत सरकार परिस्थितीवर बारकाईने लक्ष ठेवून असल्याचे सांगितले. नुकसानीचा आढावा घेण्यासाठी आणि नागरिकांना वेळोवेळी माहिती देण्यासाठी प्रशासन सक्रिय असल्याचेही त्यांनी स्पष्ट केले.