राजा रघुवंशी हत्याकांड: 'या' अटीवर मुख्य आरोपी सोनम रघुवंशीला जामीन

raja-raghuvanshi-murder-case : राष्ट्रीय स्तरावर कुप्रसिद्ध असलेल्या राजा रघुवंशी हत्या प्रकरणात एक मोठे अपडेट समोर आले आहे. मिळालेल्या माहितीनुसार, राजाच्या हत्येतील मुख्य आरोपी, त्याची पत्नी सोनम रघुवंशीला शिलाँग न्यायालयाने जामीन मंजूर केला आहे. मात्र, न्यायालयाने या अटीवर जामीन मंजूर केला आहे की, जामिनावर असताना सोनम रघुवंशी शिलाँग सोडून जाऊ शकत नाही. तिला दररोज पोलीस ठाण्यात हजर राहावे लागेल. गेल्या वर्षी मे महिन्यात मेघालयातील शिलाँग येथे हनिमूनवर असताना राजा रघुवंशीची हत्या झाली होती.

 

 

 

 

 

राजा रघुवंशी हत्या प्रकरणातील मुख्य आरोपी, त्याची पत्नी सोनम रघुवंशीला शिलाँगच्या तुरुंगात कैद करण्यात आले होते. या प्रकरणात शिलाँग पोलिसांनी सोनमसह आठ जणांना अटक केली होती. इतर तिघांना यापूर्वीच जामीन मंजूर झाला आहे. गेल्या वर्षी ९ जून रोजी सोनम रघुवंशीला उत्तर प्रदेशातील गाझीपूर येथून पोलिसांनी ताब्यात घेतले होते. राजा रघुवंशी आणि सोनम यांचे लग्न गेल्या वर्षी मे महिन्यात झाले होते. हे जोडपे हनिमूनसाठी मेघालयातील शिलाँगला गेले होते. काही दिवस बेपत्ता राहिल्यानंतर, २ जून रोजी राजाचा मृतदेह शिलाँगच्या एका दरीत सापडला.

 

 

राजा रघुवंशी हे मध्य प्रदेशातील इंदूरचे रहिवासी असलेले एक व्यावसायिक होते. लग्नानंतर राजा आणि सोनम २१ मे रोजी हनिमूनसाठी शिलाँगला आले होते. २६ मे रोजी हे जोडपे बेपत्ता झाल्याची तक्रार दाखल करण्यात आली. त्यानंतर त्यांना शोधण्यासाठी प्रशासन आणि स्थानिकांनी एक मोठी शोधमोहीम सुरू केली. अनेक दिवसांच्या अथक शोधानंतर, २ जून रोजी सोहरा येथील प्रसिद्ध वेई सॉडोंग धबधब्याजवळील उंबलाईमधील अर्लियांग रियात कुनोंगरिम येथील एका खोल दरीतून राजा रघुवंशी यांचा मृतदेह सापडला.

 

 

पोलिसांच्या तपासात असे उघड झाले की, राजा रघुवंशीची पत्नी सोनम हिचे राज कुशवाहा नावाच्या एका तरुणासोबत अनैतिक संबंध होते. त्यांनी मिळून हनिमूनच्या बहाण्याने राजा रघुवंशीच्या हत्येचा कट रचला. पोलिसांच्या म्हणण्यानुसार, आकाश सिंग राजपूत, विशाल सिंग चौहान आणि आनंद कुर्मी यांनी सोनमच्या उपस्थितीत राजाची हत्या केली. या प्रकरणी एकूण आठ जणांना अटक करण्यात आली आहे.