तेल जगतात मोठा भूकंप! यूएईच्या निर्णयाने तेल दरांवर परिणामाची शक्यता
Total Views |
अबुधाबी,
opec : जागतिक तेल बाजारात मोठी हलचल निर्माण करणारी बातमी समोर आली आहे. संयुक्त अरब अमिराती (यूएई) सुमारे ६० वर्षांनंतर ओपेक या तेल उत्पादक देशांच्या संघटनेतून बाहेर पडण्याच्या तयारीत असल्याची माहिती समोर आली आहे. हा निर्णय केवळ आर्थिक नसून राजकीयदृष्ट्याही मोठा मानला जात आहे.
ओपेकमध्ये असताना यूएईला आपल्या तेल उत्पादनावर काही मर्यादा होत्या, त्यामुळे देशाला अपेक्षित प्रमाणात उत्पादन वाढवता येत नव्हते, असे सांगितले जाते. आता बाहेर पडल्यास यूएईला स्वतःच्या गरजेनुसार उत्पादन वाढवण्याची आणि अधिक नफा मिळवण्याची संधी मिळू शकते, अशी चर्चा आहे.
या निर्णयामुळे जागतिक तेल पुरवठ्यावर परिणाम होण्याची शक्यता व्यक्त केली जात आहे. काही तज्ज्ञांच्या मते, यूएई उत्पादन वाढवू शकतो, त्यामुळे भविष्यात तेलाच्या किमतीत बदल होऊ शकतो. याचा परिणाम आंतरराष्ट्रीय बाजारावरही जाणवू शकतो.
या घडामोडींच्या पार्श्वभूमीवर खाडी देशांतील राजकीय समीकरणांमध्येही बदल होण्याची शक्यता वर्तवली जात आहे. सौदी अरेबिया आणि इतर देशांशी असलेले संबंध आणि तेल उत्पादन धोरणांवर याचा परिणाम होऊ शकतो, असेही मानले जाते.
याचवेळी, तेल पुरवठा वाढल्यास भारतासारख्या आयातदार देशांना काहीसा दिलासा मिळू शकतो, कारण इंधन आयात खर्च कमी होण्याची शक्यता व्यक्त केली जात आहे.