दिल्ली हायकोर्टात सुनावणीदरम्यान लागला अश्लील व्हिडीओ

Pornographic video in High Court दिल्ली उच्च न्यायालयात आज ऑनलाइन सुनावणीदरम्यान घडलेल्या प्रकारामुळे मोठी खळबळ उडाली आहे. न्यायालयात सुरू असलेल्या एका प्रकरणाची व्हर्च्युअल सुनावणी चालू असताना अचानक अश्लील स्वरूपातील दृश्ये दिसू लागली. हा प्रकार वारंवार घडल्याने उपस्थित सर्वजण काही क्षणांसाठी गोंधळून गेले आणि तातडीने सुनावणी थांबवावी लागली. सुनावणीदरम्यान न्यायमूर्तींसमोर आणि इतर उपस्थितांसमोर ही दृश्ये पुन्हा पुन्हा दिसू लागल्याने वातावरण गंभीर झाले. या घटनेमागे तांत्रिक त्रुटी आहे की जाणूनबुजून केलेला प्रकार, याबाबत अद्याप स्पष्टता आलेली नाही. मात्र, या घटनेनंतर न्यायालयीन कामकाज तात्काळ थांबवण्यात आले.

 

 

 

मिळालेल्या माहितीनुसार, या प्रकाराशी संबंधित काही वापरकर्त्यांच्या खात्यांमधून हा कंटेंट दिसल्याचे समोर आले आहे. काही वेळानंतर सुनावणी पुन्हा सुरू करण्याचा प्रयत्न करण्यात आला, मात्र त्यावेळीही तोच प्रकार घडल्याने परिस्थिती अधिक गंभीर झाली.याचदरम्यान, स्क्रीनवर एक संदेशही ऐकू आल्याचे सांगितले जात आहे, ज्यामध्ये हा प्रकार बाहेरून केलेल्या सायबर हल्ल्याचा भाग असल्याचे सूचित करण्यात आले. त्यामुळे या घटनेमागे हॅकिंगचा हात असण्याची शक्यता व्यक्त केली जात आहे. या घटनेनंतर न्यायालय प्रशासनाने तातडीने तपास सुरू केला असून संपूर्ण प्रकरण दिल्ली पोलिसांच्या सायबर गुन्हे शाखेकडे सोपवण्यात आले आहे. या प्रकारामागील कारण शोधण्यासाठी सखोल चौकशी सुरू आहे. दरम्यान, अशा प्रकारामुळे ऑनलाइन न्यायालयीन सुनावणीच्या सुरक्षिततेवर गंभीर प्रश्न उपस्थित झाले आहेत. न्यायालयीन कामकाजातील तांत्रिक सुरक्षेबाबत अधिक कडक उपाययोजना करण्याची गरज असल्याचे मतही व्यक्त केले जात आहे.