अमेरिकेने अचानक लष्करप्रमुखांसह वरिष्ठ अधिकाऱ्यांना हटविले

US removed army chief इराणसोबत सुरू असलेल्या संघर्षाच्या पार्श्वभूमीवर अमेरिकन लष्करात मोठे बदल करण्यात आले आहे. या निर्णयामुळे संरक्षण व्यवस्थेत खळबळ माजली आहे. अमेरिकेचे संरक्षणमंत्री पीट हेगसेथ यांनी लष्करातील सर्वोच्च पदावर असलेल्या जनरल रँडी जॉर्ज यांच्यासह आणखी दोन वरिष्ठ अधिकाऱ्यांना त्यांच्या पदावरून दूर केले आहे. या निर्णयाची घोषणा संरक्षण विभागाने केली असली तरी त्यामागील नेमके कारण स्पष्ट करण्यात आलेले नाही. जनरल रँडी जॉर्ज हे २०२३ पासून लष्करप्रमुख म्हणून कार्यरत होते आणि त्यांचा कार्यकाळ अद्याप पूर्ण झालेला नव्हता.

 

 

 

 

तरीही त्यांना अचानक पदावरून हटवण्यात आल्याने अनेक प्रश्न उपस्थित होत आहेत. संरक्षण विभागाचे प्रवक्ते शॉन पार्नेल यांनी ही कारवाई तात्काळ प्रभावाने लागू होणार असल्याचे सांगितले. दरम्यान, गेल्या काही महिन्यांत वरिष्ठ लष्करी अधिकाऱ्यांमध्ये मोठ्या प्रमाणावर बदल करण्यात आले असून हा त्याच मालिकेतील आणखी एक निर्णय मानला जात आहे. या घडामोडी अशा वेळी घडत आहेत, जेव्हा अमेरिका आणि इराण यांच्यातील तणाव अधिकच वाढलेला आहे. त्यामुळे युद्धाच्या परिस्थितीत नेतृत्वात होणारे असे बदल कितपत योग्य आहेत, याबाबत चर्चा सुरू झाली आहे.

 

 

या निर्णयामागे धोरणात्मक कारणे असू शकतात, मात्र अधिकृत पातळीवर त्याची पुष्टी करण्यात आलेली नाही. जनरल जॉर्ज यांच्या जागी जनरल क्रिस्टोफर ला नीव्ह यांची नियुक्ती करण्यात आली आहे. विशेष म्हणजे, अल्पावधीतच त्यांची झालेली बढती ही लक्षणीय मानली जात आहे. यापूर्वीही अनेक उच्चपदस्थ अधिकाऱ्यांना पदावरून दूर करण्यात आले असून काहींनी मुदतपूर्व निवृत्ती घेतली आहे. जनरल जॉर्ज यांनी आपल्या कारकिर्दीत अफगाणिस्तान आणि इराकमधील मोहिमांमध्ये महत्त्वाची भूमिका बजावली होती. तसेच त्यांनी संरक्षण मंत्रालयात वरिष्ठ सल्लागार म्हणूनही काम पाहिले होते. त्यांच्या कार्यकाळात लष्कराच्या आधुनिकीकरणासाठी विविध उपक्रम राबवण्यात आले होते. या सर्व घडामोडींमुळे अमेरिकेच्या लष्करी नेतृत्वात मोठे परिवर्तन होत असल्याचे चित्र दिसत आहे.