'आप'ल्याच सदस्यांमुळे राजकीय संकटात आप!

AAP in political crisis पंजाबमधील राजकीय घडामोडींना वेग आला असून, मुख्यमंत्री भगवंत मान यांच्या नेतृत्वाखालील आम आदमी पक्ष सरकारने आपले बहुमत ठोस करण्यासाठी महत्त्वाचे पाऊल उचलण्याची तयारी केली आहे. अलीकडेच राज्यसभेतील काही सदस्यांनी पक्षत्याग केल्यामुळे राज्यातील राजकारण ढवळून निघाले आहे आणि आमदारांमध्येही फूट पडण्याच्या शक्यतेने वातावरण तापले आहे. या पार्श्वभूमीवर राज्य सरकारने १ मे रोजी विशेष अधिवेशन बोलावले असून, त्यामध्ये बहुमत सिद्ध करण्यासाठी विश्वासदर्शक ठराव मांडण्याची शक्यता व्यक्त केली जात आहे. हा ठराव मंजूर झाल्यास सरकारला पुढील काही महिन्यांसाठी स्थैर्य मिळणार असल्याचे मानले जात आहे.

 

 

 

२०२२ च्या निवडणुकीत मोठ्या बहुमताने सत्तेवर आलेल्या या पक्षासमोर सध्या राजकीय आव्हान उभे राहिले आहे. काही आमदार पक्षांतर करू शकतात, अशी चर्चा सुरू असल्याने सरकारने घटनात्मक मार्गाने आपले बहुमत स्पष्ट करण्याचा निर्णय घेतला आहे. विशेष अधिवेशनाच्या दिवशी सकाळी मंत्रिमंडळाची बैठकही होणार असून, त्यामध्ये पुढील रणनीती ठरवली जाणार आहे. यापूर्वीही अशाच परिस्थितीत सरकारने विश्वासदर्शक ठरावाद्वारे आपले बहुमत सिद्ध केले होते. त्यामुळे यावेळीही तोच मार्ग स्वीकारत राजकीय अनिश्चितता दूर करण्याचा प्रयत्न होत असल्याचे दिसून येत आहे. पंजाबमधील सध्याची परिस्थिती पाहता, या अधिवेशनाकडे सर्वांचे लक्ष लागले आहे.