आता माघार नाहीच!

US-Iran dispute अमेरिका आणि इराण यांच्यातील तणाव पुन्हा तीव्र होत असून दोन्ही देशांमध्ये मोठ्या संघर्षाची शक्यता निर्माण झाल्याची चिन्हे दिसत आहेत. अमेरिकेचे अध्यक्ष डोनाल्ड ट्रम्प यांनी इराणविरोधातील नौदल नाकेबंदीचे जोरदार समर्थन करत ती अतिशय प्रभावी ठरल्याचा दावा केला आहे. इराणने अणु कार्यक्रम पूर्णपणे सोडल्याशिवाय कोणतीही तडजोड स्वीकारली जाणार नाही, अशी ठाम भूमिका त्यांनी मांडली.ट्रम्प यांनी अमेरिकेच्या लष्करी शक्तीवर भर देत जगातील सर्वात सक्षम सैन्य आपल्याकडे असल्याचे सांगितले आणि इराणने शेवटी माघार घ्यावी लागेल, असा इशाराही दिला. दुसरीकडे, इराणकडूनही तीव्र प्रतिक्रिया उमटली आहे. अमेरिकेने घातलेली नाकेबंदी उठवण्यास नकार दिल्यानंतर तेहरानने कठोर पवित्रा घेतला असून, युद्धजन्य परिस्थितीत नवे आणि धोकादायक शस्त्र वापरण्याचा इशारा दिला आहे.

 

 

 

इराणच्या नौदल प्रमुखांनी असा दावा केला की, त्यांच्या नव्या शस्त्रामुळे शत्रू सैन्याला गंभीर शारीरिक परिणामांना सामोरे जावे लागू शकते. तसेच, होर्मुझ सामुद्रधुनीतून होणारा तेल व्यापार रोखून इराणवर आर्थिक दबाव आणण्याच्या अमेरिकेच्या धोरणाची त्यांनी खिल्ली उडवली. त्यांच्या मते, बाह्य दबावामुळे इराण झुकणार नाही आणि कोणत्याही आक्रमणाला ठाम उत्तर दिले जाईल.दरम्यान, अमेरिकेकडूनही इराणवर आर्थिक निर्बंध कायम ठेवत चर्चेचा मार्ग खुला असल्याचे संकेत देण्यात आले आहेत. दोन्ही देशांमध्ये थेट संवाद सुरू असल्याचे सांगितले जात असले तरी, अटींवर कोणतीही तडजोड न होण्याची चिन्हे दिसत असल्याने परिस्थिती अधिक चिघळण्याची भीती व्यक्त केली जात आहे.एकूणच, वाढत्या तणावामुळे पश्चिम आशियातील परिस्थिती संवेदनशील बनली असून, या संघर्षाचा जागतिक पातळीवर परिणाम होण्याची शक्यता व्यक्त केली जात आहे.