ताशी १५४.२ किमी वेगाचा कहर; २३ वर्षीय गोलंदाजाने घातला धुमाकूळ

IPL 2026 : आयपीएल २०२६ मध्ये एक नवीन वेगवान स्टार उदयास आला आहे. गुजरात टायटन्सचा २३ वर्षीय वेगवान गोलंदाज अशोक शर्माने आपल्या वेगाने क्रिकेट विश्वात खळबळ उडवून दिली आहे. राजस्थान रॉयल्सविरुद्धच्या सामन्यात त्याने ताशी १५४.२ किमी वेगाने चेंडू टाकून या हंगामातील सर्वात वेगवान चेंडूचा विक्रम प्रस्थापित केला. आयपीएल २०२६ च्या नवव्या सामन्यात, राजस्थान रॉयल्सविरुद्ध १६ व्या षटकात अशोक शर्माने वेगाचे असे प्रदर्शन केले जे दीर्घकाळ स्मरणात राहील. प्रथम, त्याने डोनोव्हन फरेराला ताशी १५०.७ किमी वेगाने चेंडू टाकला, त्यानंतर षटकाच्या शेवटच्या चेंडूवर ताशी १५४.२ किमी वेगाचा भेदक यॉर्कर टाकून ध्रुव जुरेलला चकित केले. चेंडू इतका वेगवान होता की तो कुठे जात आहे हे जुरेलला दिसलेही नाही.

 

 

 

 

 

विशेष म्हणजे, हा विक्रम करणारा चेंडू टाकण्यापूर्वीच अशोक शर्माच्या बोटाला दुखापत झाली होती. डोनोव्हान फरेराचा जोरदार फटका अडवण्याच्या प्रयत्नात त्याला दुखापत झाली, पण असे असूनही, त्याने पुढच्याच चेंडूवर या हंगामातील सर्वात वेगवान चेंडू टाकला. हे केवळ एका चेंडूचे यश नव्हते. आशिष शर्माने आपल्या चार षटकांच्या स्पेलमध्ये तीन वेळा ताशी १५० किमी पेक्षा जास्त वेग गाठला, ज्यामुळे त्याचा सातत्यपूर्ण वेग आणि आक्रमकता दिसून आली.

 

 

प्रसिद्ध वेगवान गोलंदाज डेल स्टेनही त्याच्या गोलंदाजीने प्रभावित झाला. तो म्हणाला की, त्याचा रन-अप वेगवान आणि दमदार आहे, गोलंदाजी करताना त्याचे डोके स्थिर राहते आणि त्याचे लँडिंग अचूक असते. स्टेनच्या मते, ही एक स्वच्छ आणि सफाईदार ॲक्शन आहे, जी वेगवान गोलंदाजांमध्ये क्वचितच पाहायला मिळते.

 

 

 

 

 

अशोक शर्मा - १५४.२ किमी प्रति तास

अन्रिक नोरखिया ​​- १५०.९ किमी प्रति तास

कार्तिक त्यागी - १४९.७ किमी प्रति तास

कागिसो रबाडा - १४९.१ किमी प्रति तास

 

अशोक शर्माने आता आयपीएलच्या इतिहासातील सर्वात वेगवान भारतीय गोलंदाजांच्या यादीत तिसरे स्थान पटकावले आहे. आयपीएलमधील सर्वात वेगवान चेंडूचा विक्रम उमरान मलिकच्या नावावर आहे. मयंक यादव दुसऱ्या क्रमांकावर आहे. या दोन्ही गोलंदाजांनी आयपीएलमध्ये १५६ किमी प्रति तासापेक्षा जास्त वेगाने गोलंदाजी केली आहे.

 

 

उमरान मलिक - १५७ किमी प्रति तास

मयंक यादव - १५६.७ किमी प्रति तास

अशोक शर्मा - १५४.२ किमी प्रति तास

 

 

अशोक शर्माने नुकतेच पंजाब किंग्सविरुद्ध आयपीएलमध्ये पदार्पण केले. त्याने आपला पहिला चेंडू १४९.७ किमी प्रतितास वेगाने टाकून सर्वांना आश्चर्यचकित केले. त्याच सामन्यात, त्याने उत्कृष्ट गोलंदाजी करत मार्को जॅनसेनला बाद करून आपली पहिली विकेट घेतली आणि कर्णधार शुभमन गिलला प्रभावित केले. अशोक राजस्थानकडून देशांतर्गत क्रिकेट खेळतो. उजव्या हाताचा वेगवान गोलंदाज अशोक शर्मा एकेकाळी राजस्थान रॉयल्ससाठी नेट बॉलर होता, त्यानंतर त्याला २०२२ मध्ये कोलकाता नाईट रायडर्सकडून ५५ लाख रुपयांचा पहिला आयपीएल करार मिळाला. पण त्याला केकेआरकडून खेळण्याची संधी मिळाली नाही आणि तो आरआरमध्ये दाखल झाला. आरआरने त्याला २०२५ च्या मेगा लिलावात ३० लाख रुपयांना विकत घेतले. आणखी एक हंगाम बेंचवर घालवल्यानंतरही, गुजरात टायटन्सने त्याला २०२६ च्या हंगामापूर्वी ९० लाख रुपयांना आपल्या संघात घेतले.