पंतच्या दमदार खेळीने लखनौचा विजय; हैदराबाद पराभूत
Total Views |
हैद्राबाद,
ipl-2026 : सनरायझर्स हैदराबाद आणि लखनौ सुपर जायंट्स यांच्यात खेळलेल्या सामन्यात लखनौने पाच गडी राखून थरारक विजय मिळवला. हैदराबादने प्रथम फलंदाजी करत २० षटकांत १५६ धावा केल्या, त्याला प्रत्युत्तर देताना लखनौने १९.५ षटकांत १६० धावा करत सामना जिंकला.
लखनौच्या विजयात कर्णधार रिषभ पंत याने नाबाद ६८ धावांची शानदार खेळी करत महत्त्वाची भूमिका बजावली. त्याला एडन मार्करामने ४५ धावांची साथ दिली. सुरुवातीला काही गडी लवकर बाद झाले तरी पंतने संयमी खेळी करत संघाला विजय मिळवून दिला.
याआधी हैदराबादच्या डावात हेनरिक क्लासेन याने ६२ धावा, तर नितीश रेड्डीने ५६ धावा करत संघाला सावरले. मात्र सुरुवातीला मोहम्मद शमीच्या भेदक गोलंदाजीमुळे हैदराबादची फलंदाजी डळमळीत झाली.
लखनौच्या गोलंदाजांनी सुरुवातीला अचूक मारा करत हैदराबादला मोठी धावसंख्या उभारण्यापासून रोखले. त्यानंतर फलंदाजांनी शेवटपर्यंत संयम राखत लक्ष्य गाठले. या विजयासह लखनौने स्पर्धेत पहिला विजय नोंदवला असून, पुढील सामन्यांसाठी आत्मविश्वास मिळवला आहे.