दिल्ली हादरवण्याचा कट उधळला; मुंबईतून १८ वर्षीय तरुण अटकेत

delhi-blast-conspiracy : दिल्लीमध्ये मोठा स्फोट घडवण्याचा कट उधळून लावण्यात सुरक्षा यंत्रणांना यश आले आहे. दिल्ली पोलिसांच्या स्पेशल सेलने महाराष्ट्र एटीएसच्या मदतीने संयुक्त कारवाई करत मुंबईतील कुर्ला परिसरातून १८ वर्षीय हमाज सिद्दीकी या तरुणाला अटक केली. या तरुणावर दिल्लीत बॉम्बस्फोट घडवण्याच्या कटात सहभागी असल्याचा आरोप आहे. या कारवाईनंतर संपूर्ण प्रकरणाची सखोल चौकशी सुरू असून, यामागे आणखी मोठे जाळे असल्याचा संशय व्यक्त केला जात आहे.

 

 

 

 

अटक झाल्यानंतर हमाजचे वडील जलालुद्दीन सिद्दीकी यांनी माध्यमांसमोर येत मुलगा निर्दोष असल्याचा दावा केला. त्यांच्या म्हणण्यानुसार, हमाज गेल्या तीन वर्षांपासून ऑनलाइन गेम PUBGमध्ये गुंतलेला होता आणि त्याच माध्यमातून तो काही अनोळखी लोकांच्या संपर्कात आला. तो फोनवर बराच वेळ बोलत असे, पण प्रकरण इतके गंभीर असेल याची कल्पना नव्हती, असे त्यांनी सांगितले. हमाज हा अभ्यासात चांगला असून यंदा बारावीची परीक्षा देणार होता, असेही त्यांनी नमूद केले.

 

कुटुंबाची आर्थिक परिस्थिती अत्यंत हलाखीची असून आई कॅन्सरसारख्या गंभीर आजाराने त्रस्त आहे. घर चालवण्यासाठी कर्ज काढावे लागले आहे. इतकेच नव्हे, तर दिल्लीला जाऊन मुलाला भेटण्यासाठीही पैसे नसल्याचे वडिलांनी सांगितले. अटकेच्या दिवशी ते नातेवाईकाच्या अंत्यसंस्कारासाठी गेले होते आणि पोलिसांनी घराची झडती घेतली तेव्हा कोणतीही संशयास्पद वस्तू सापडली नाही, फक्त दोन मोबाईल जप्त करण्यात आले, असा दावा त्यांनी केला.

 

दरम्यान, पोलिसांकडून हमाजची सखोल चौकशी सुरू आहे. तो नेमका कोणाच्या संपर्कात होता आणि यामागे कोणते मोठे नेटवर्क आहे का, याचा तपास केला जात आहे. काही मेसेंजर ग्रुप्समध्ये भारतात हल्ल्यांची योजना आखल्याचे संदेश आढळल्याची माहिती समोर आली आहे. या प्रकरणात चार जणांना ताब्यात घेण्यात आले होते, त्यापैकी दोघांना अटक करण्यात आली असून दोघांना नोटीस देऊन सोडण्यात आले आहे.

 

तसेच, ठाणे जिल्ह्यातील खडावली परिसरातून अटक केलेल्या दुसऱ्या आरोपीच्या घरातून काही इलेक्ट्रॉनिक उपकरणे जप्त करण्यात आली आहेत. ही उपकरणे कथितपणे हल्ल्याच्या तयारीसाठी वापरली जात असल्याचा संशय आहे. हमाजच्या मोबाईलमधूनही काही आक्षेपार्ह संदेश आणि कागदपत्रे मिळाल्याचे पोलिसांनी सांगितले आहे.

 

तपासादरम्यान, आरोपींचे काही दहशतवादी संघटनांशी संबंध असल्याचाही संशय व्यक्त केला जात आहे. विशेषतः ऑनलाइन माध्यमांद्वारे युवकांना प्रभावित करून अशा कारवायांमध्ये ओढले जात असल्याची बाब समोर आली आहे. सोशल मीडिया, गेमिंग प्लॅटफॉर्म आणि मेसेंजर अॅप्सच्या माध्यमातून युवकांमध्ये कट्टर विचार रुजवण्याचा प्रयत्न होत असल्याने सुरक्षा यंत्रणांची चिंता वाढली आहे.

या संपूर्ण प्रकरणामुळे देशातील सुरक्षा यंत्रणा अधिक सतर्क झाल्या असून, पुढील काही दिवसांत या नेटवर्कबाबत आणखी धक्कादायक खुलासे होण्याची शक्यता वर्तवली जात आहे.