पीसीबीने घातली फखर जमानवर बंदी; पीएसएलमध्ये बनला 'या' संघाचा प्रशिक्षक

fakhar-zaman : पाकिस्तानचा फलंदाज फखर जमान पाकिस्तान सुपर लीग (पीएसएल) सामन्यादरम्यान चेंडूशी छेडछाड केल्याबद्दल दोषी आढळला. जमानवर दोन सामन्यांची बंदी घालण्यात आली आहे. ३ एप्रिल रोजी पीएसएलच्या अपील समितीने त्याचे अपील फेटाळल्यावर या निर्णयाला पुष्टी मिळाली. चेंडूची स्थिती बदलल्यामुळे त्याच्यावर पीएसएल आचारसंहितेच्या लेव्हल ३ उल्लंघनाचा आरोप ठेवण्यात आला होता. दोन सामन्यांची बंदी असूनही, लाहोर कलंदर्सने त्याला संघातून काढले नाही आणि आता त्याला एक नवीन भूमिका दिली आहे. लाहोर संघाने त्याला कायम ठेवले आहे.

 

 

 

 

 

 

'द संडे गार्डियन'मधील वृत्तानुसार, लाहोर कलंदर्सने फखर जमानची त्यांच्या संघाच्या प्रशिक्षकपदी नियुक्ती केली आहे. लाहोर कलंदर्सने फखर जमानला वेगळ्या भूमिकेत कायम ठेवण्याचा निर्णय घेतला. त्याच्या निलंबनाच्या काळात, त्याने ३ एप्रिल रोजी लाहोरमध्ये मुलतान सुलतान्सविरुद्धच्या सामन्यादरम्यान लाहोर संघासाठी तात्पुरते मुख्य प्रशिक्षक म्हणून काम पाहिले होते. पाकिस्तानी मीडियाच्या वृत्तानुसार, त्या सामन्याचे नेतृत्व फखर जमान यांच्याकडे होते, मात्र लाहोरचे नियमित प्रशिक्षक रसेल डोमिंगो यांनी ही भूमिका का स्वीकारली नाही याचे कोणतेही स्पष्टीकरण देण्यात आलेले नाही.

 

 

बंदीमुळे फखर जमान मुलतान सुलतान्सविरुद्धचा सामना खेळू शकले नाहीत. ते ९ एप्रिल रोजी इस्लामाबाद युनायटेडविरुद्धचा सामनाही खेळू शकणार नाहीत. ११ एप्रिल रोजी पेशावर झल्मीविरुद्धच्या सामन्यासाठी ते संघात परतण्याची शक्यता आहे. पावसामुळे लाहोर आणि मुलतान यांच्यातील सामना केवळ १३ षटकांचा झाला. प्रथम फलंदाजी करताना लाहोरने ५ गडी गमावून १८५ धावा केल्या. प्रत्युत्तरात, मुलतान सुलतान्स १३ षटकांत केवळ १६५ धावाच करू शकले आणि २० धावांनी सामना गमावला. फखर जमान यांच्या अनुपस्थितीत शाहीन आफ्रिदीने लाहोरचे नेतृत्व केले.