बारामतीत काँग्रेसचा उमेदवार; संजय राऊतांनी व्यक्त केली नाराजी
Total Views |
पुणे,
sanjay-raut : राज्याचे माजी उपमुख्यमंत्री अजित पवार यांच्या निधनामुळे रिक्त झालेल्या बारामती विधानसभा मतदारसंघाच्या पोटनिवडणुकीचे राजकीय चित्र आता स्पष्ट झाले आहे. या पोटनिवडणुकीसाठी महायुतीने सुरुवातीपासूनच प्रयत्न केले होते की ही निवडणूक बिनविरोध व्हावी, मात्र काँग्रेसने अचानक अॅड. आकाश मोरे यांना उमेदवारी दिल्याने हा प्रयत्न फोल ठरला. त्यामुळे आता बारामतीत सुनेत्रा पवार विरुद्ध आकाश मोरे अशी थेट लढत होण्याची शक्यता आहे.
ही निवडणूक बिनविरोध व्हावी, यासाठी सुनेत्रा पवार यांनी स्वतः पुढाकार घेतला होता. त्यांनी उद्धव ठाकरे आणि काँग्रेसचे प्रदेशाध्यक्ष हर्षवर्धन सपकाळ यांच्याशी संपर्क साधला आणि निवडणुकीत पाठिंबा मिळवण्याचे आवाहन केले. मात्र, रविवारी रात्री दिल्लीतून काँग्रेसने आकाश मोरे यांच्या नावाची अधिकृत घोषणा केल्याने राजकीय चर्चेला पूर्णविराम मिळाला.
दुसऱ्या बाजूला, महाविकास आघाडीतील मित्रपक्ष ठाकरे गटाचे खासदार संजय राऊत यांनी काँग्रेसच्या भूमिकेवर टीका केली. राऊत म्हणाले, "सुनेत्रा पवार यांनी फोन करून उद्धव ठाकरे यांच्यासोबत चर्चा केली, आम्ही महाविकास आघाडीत आहोत, मात्र काँग्रेसने तिथे उमेदवार उभा केला. सुनेत्रा पवार आणि उद्धव ठाकरेंमधील चर्चा फक्त पाठिंब्यासाठी होती. हर्षवर्धन सपकाळ यांनाही फोन केला, छगन भुजबळ, शरद पवार यांची भेट घेतली. त्यामुळे निर्णय केवळ उद्धव ठाकरेंचाच नव्हता, यात खूप खेळाडू होते."
संजय राऊत यांनी पुढे सांगितले, "बारामती हा पवारांचा गड आहे, आणि तिथे निकाल काय लागणार हे सगळ्यांना माहिती आहे. राजकारणात काही विषय सामोपचाराने घ्यावेत, पण काँग्रेसने उमेदवार दिल्याने बिनविरोध निवडणुकीची संधी चुकली. काँग्रेसची भूमिका असते की ती बिनविरोध निवडणुकीला विरोध करते. ज्या वेळी त्यांच्या गैरसोयी होते, तेव्हा ते बिनविरोध निवडणुकीला विरोध करतात, आणि निवडणूक ही सरकार विरोधात राग व्यक्त करण्याचे माध्यम बनते."
या निवडणुकीत आतापर्यंत १९ हून अधिक उमेदवार अर्ज दाखल करीत असून, हा आकडा २० च्या पार जाण्याची शक्यता आहे. जर काँग्रेसने आपला उमेदवार मागे घेतला, तर सुनेत्रा पवार यांचा मार्ग अधिक सोपा होईल.
राजकीय तज्ज्ञांच्या मते, ही निवडणूक सत्ताधारी पक्ष आणि काँग्रेसमधील संबंधांवरही प्रभाव टाकू शकते, कारण बिनविरोध निवडणूक नसल्याने दोन्ही पक्षांमधील सहकार्याचे राजकीय समीकरण बदलू शकते. निवडणूक प्रक्रियेत येणारा मतदानाचा रंजक आणि थरारक संघर्ष बारामतीकरांसाठी आगामी काही आठवड्यांत पाहायला मिळेल.