नवी मुंबईत टेस्लाचे पहिले चार्जिंग स्टेशन सुरू

Tesla charging station in Navi Mumbai इलेक्ट्रिक वाहनांच्या लोकप्रियतेला चालना देत टेस्लाने नवी मुंबईतील नेक्सस सीवूड्स मॉलमध्ये आपले पहिले चार्जिंग स्टेशन सुरू केले आहे. या केंद्रावर टेस्ला वाहनांसाठी एकूण आठ चार्जिंग पॉईंट्स आहेत, ज्यामध्ये चार सुपरचार्जर आणि चार डेस्टिनेशन चार्जर बसवले गेले आहेत. कंपनीने भारतातील आपले फास्ट चार्जिंग नेटवर्क वाढवण्यासाठी हे पाऊल उचलले आहे. नवीन स्टेशन मॉलच्या बी1 पार्किंग लॉटमध्ये आहे. चार सुपरचार्जर २५० किलोवॅटपर्यंतचा डीसी फास्ट-चार्जिंग वेग देतात, तर चार एसी डेस्टिनेशन चार्जर ११ किलोवॅट आउटपुट देतात. त्यामुळे ग्राहक त्यांच्या गरजेनुसार आणि वेळापत्रकानुसार चार्जिंग पद्धत निवडू शकतात.

 

 

 

टेस्लाने सांगितले की, मॉल्स, महामार्ग आणि फूड कोर्ट्ससारख्या ठिकाणी चार्जिंग सुविधा वाढवण्याची ही कंपनीची योजना आहे. यापूर्वी गुरुग्राम, दिल्ली आणि मुंबई येथे स्टेशन्स बसवण्यात आले आहेत. कंपनीच्या माहितीनुसार, त्यांचे व्ही4 सुपरचार्जर टेस्ला मॉडेल वायला फक्त १५ मिनिटांत २७५ किमीची रेंज देण्यास सक्षम आहेत. ग्राहक टेस्ला ॲपद्वारे स्टेशन शोधू शकतात, उपलब्ध जागा पाहू शकतात, चार्जिंग पूर्ण झाल्यावर संदेश मिळवू शकतात आणि थेट ॲपद्वारे पेमेंट करू शकतात. या नव्या स्टेशनमुळे टेस्लाच्या भारतातील चार्जिंग नेटवर्कमध्ये आता चार स्टेशन्स झाले आहेत, ज्यामध्ये २० सुपरचार्जर आणि १४ डेस्टिनेशन चार्जर आहेत. गुरुग्राममधील डीएलएफ होरायझन सेंटर, एरोसिटीमधील वर्ल्डमार्क ३, मुंबईतील वन बीकेसी, गुरुग्राम टेस्ला सेंटर आणि नवी मुंबईतील नेक्सस सीवूड्स मॉल हे सध्या प्रमुख केंद्र आहेत.

 

 

चार्जिंग केंद्राबरोबरच, नेक्सस सीवूड्स मॉलमध्ये टेस्लाने एक पॉप-अप स्टोअरही उघडले आहे, जिथे ग्राहक टेस्लाच्या गाड्या पाहू शकतात, टेस्ट ड्राइव्ह घेऊ शकतात आणि तंत्रज्ञान, सुरक्षा वैशिष्ट्ये व डिझाइन प्रत्यक्ष अनुभवू शकतात. टेस्लाच्या २५० किलोवॅट सुपरचार्जरचा खर्च प्रति युनिट ₹२४ आहे. स्टँडर्ड मॉडेल वायला पूर्ण चार्ज करण्यासाठी अंदाजे ₹1,800 आणि लाँग रेंज व्हेरिएंटला सुमारे ₹2,000 खर्च येतो. ११ किलोवॅट डेस्टिनेशन चार्जरसाठी प्रति युनिट ₹१४ आकारला जातो.