मतदानाआधी काँग्रेसला जोरदार धक्का!

Assam Assembly Elections : आसाम विधानसभा निवडणुकीच्या एक दिवस आधी एक मोठी राजकीय घडामोड समोर आली आहे. उदलगुरी मतदारसंघातील काँग्रेसचे उमेदवार सुरेन डायमरी यांनी बुधवारी पक्षातून राजीनामा दिल्याची घोषणा केली आणि निवडणुकीच्या रिंगणातून माघार घेतली. तथापि, काँग्रेस पक्षाने स्पष्ट केले आहे की डायमरी यांनी अद्याप पक्षाकडे औपचारिकपणे राजीनामा सादर केलेला नाही. निवडणूक आयोगाच्या एका वरिष्ठ अधिकाऱ्याने सांगितले की, उमेदवारी अर्ज मागे घेण्याची अंतिम मुदत केव्हाच उलटून गेल्याने डायमरी यांचे नाव इलेक्ट्रॉनिक मतदान यंत्रांवर कायम राहील आणि मतदार त्यांना मतदान करू शकतील.

 

 

 

 

 

 

काँग्रेसचे प्रवक्ते बेदाब्रता बोरा यांनी पीटीआयला सांगितले की, डायमरी यांनी आपला निर्णय माध्यमांना कळवला होता, परंतु पक्षाला अद्याप त्यांचा राजीनामा मिळालेला नाही. यापूर्वी, सुरेन डायमरी यांनी पत्रकारांना सांगितले होते की, त्यांनी काँग्रेसमधून राजीनामा दिला असून निवडणुकीच्या रिंगणातून माघार घेण्याचा निर्णय घेतला आहे. ते म्हणाले, "काँग्रेसमध्ये राहण्यात काहीच फायदा नाही. पक्षाने माझा विश्वासघात केला आहे." काँग्रेस फक्त मिया समाजासाठी काम करते, पण माझ्यासारख्या अनुसूचित जमातींसाठी काहीही करत नाही.

 

 

डायमरी यांनी असाही दावा केला आहे की, उमेदवार म्हणून घोषित झाल्यानंतर त्यांना पक्षाकडून कोणताही पाठिंबा मिळाला नाही. ते म्हणाले, "मी पक्षाच्या नेतृत्वाला वारंवार फोन केला, पण त्यांनी माझ्या फोनला उत्तरही दिले नाही. मला खूप वाईट वाटत आहे कारण त्यांनी मला अजिबात मदत केली नाही. जिल्हा काँग्रेस समितीनेही मला मदत केली नाही." डायमरी यांनी स्पष्ट केले की, त्यांनी बराच काळ वाट पाहिली, पण कोणताही प्रतिसाद न मिळाल्याने त्यांनी पक्ष सोडण्याचा निर्णय घेतला. निवडणुकीच्या एक दिवस आधी त्यांच्या राजीनाम्याबद्दल विचारले असता, ते म्हणाले, "मी पक्षाशी विश्वासघात केला नाही; पक्षानेच माझ्याशी विश्वासघात केला."

 

 

दरम्यान, निवडणूक आयोगाने स्पष्ट केले आहे की, उमेदवारी अर्ज मागे घेण्याची अंतिम मुदत केव्हाच उलटून गेली आहे आणि आता ईव्हीएममधून कोणत्याही उमेदवाराचे नाव काढता येणार नाही. आसाम विधानसभेच्या १२६ जागांसाठी ९ एप्रिल रोजी मतदान होणार असून, ४ मे रोजी निकाल जाहीर होईल. उदलगुरी जागेसाठी चार उमेदवार निवडणूक लढवत आहेत. डायमरी यांच्या व्यतिरिक्त, बोडोलँड पीपल्स फ्रंटचे (भाजपचा मित्रपक्ष) रिहोन डायमरी, युनायटेड पीपल्स पार्टी लिबरलचे दिपेन बोरो आणि व्होटर्स पार्टी इंटरनॅशनलचे युनिके बसुमतारी हे एकमेकांविरुद्ध निवडणूक लढवत आहेत.