शस्त्रसंधीनंतरही भारतीयांना तातडीने इराण सोडण्याचा सल्ला!

Indians must leave Iran immediately इराणमध्ये तणाव कमी करण्यासाठी शस्त्रसंधी जाहीर झाल्यानंतरही तेथील परिस्थिती पूर्णपणे सुरक्षित नसल्याचे संकेत मिळत आहेत. या पार्श्वभूमीवर तेहरानमधील भारतीय दूतावासाने इराणमध्ये असलेल्या भारतीय नागरिकांसाठी तातडीचा इशारा जारी केला आहे. दूतावासाने नागरिकांना शक्य तितक्या लवकर देश सोडण्याचा सल्ला देत अधिक सतर्क राहण्याचे आवाहन केले आहे.

 

 

 

नुकत्याच दिलेल्या सूचनेत दूतावासाने स्पष्ट केले आहे की, सध्याची परिस्थिती लक्षात घेता भारतीयांनी त्यांच्या संपर्कात राहावे आणि त्यांनी सुचवलेल्या मार्गांचा वापर करून सुरक्षितरीत्या बाहेर पडण्याचा प्रयत्न करावा. विशेष म्हणजे, कोणत्याही आंतरराष्ट्रीय सीमेच्या जवळ जाण्यापूर्वी दूतावासाशी संपर्क साधणे अत्यावश्यक असल्याचेही त्यांनी बजावले आहे. यापूर्वी दिलेल्या मार्गदर्शक सूचनांमध्ये नागरिकांना काही काळ जिथे आहेत तिथेच थांबण्याचा सल्ला देण्यात आला होता. त्यावेळी वीज प्रकल्प, लष्करी ठिकाणे तसेच उंच इमारतींच्या वरच्या मजल्यांपासून दूर राहण्यास सांगण्यात आले होते. घराच्या आत सुरक्षित राहणे आणि कोणतीही हालचाल करताना दूतावासाशी समन्वय ठेवणे आवश्यक असल्याचेही स्पष्ट करण्यात आले होते. दूतावासाने उपलब्ध करून दिलेल्या निवासस्थानी थांबलेल्या नागरिकांनीही त्यांच्या खोल्यांमध्येच राहावे आणि अधिकाऱ्यांशी सातत्याने संपर्क ठेवावा, असे आवाहन करण्यात आले आहे.

 

दरम्यान, अमेरिका आणि इराण यांच्यात काही काळासाठी हल्ले थांबवण्याचा निर्णय घेण्यात आला असला, तरी परिस्थिती अजूनही पूर्णपणे स्थिर झालेली नाही. त्यामुळे खबरदारी म्हणून भारतीय नागरिकांना अधिक जागरूक राहण्याचे निर्देश देण्यात आले आहेत. अधिकृत माहितीनुसार, संघर्ष सुरू झाला तेव्हा विद्यार्थ्यांसह सुमारे नऊ हजार भारतीय इराणमध्ये होते. त्यापैकी आतापर्यंत सुमारे एक हजार आठशे जण सुरक्षितपणे भारतात परतले आहेत. उर्वरित नागरिकांसाठी मदत आणि मार्गदर्शन उपलब्ध व्हावे यासाठी दूतावासाने आपत्कालीन संपर्क क्रमांकही जाहीर केले असून सर्वांनी अधिकृत सूचनांवर लक्ष ठेवण्याचे आवाहन करण्यात आले आहे.