पंतप्रधान मोदींच्या हस्ते भव्य 'ध्यान मंदिर'चे लोकार्पण! VIDEO

pm-modi : पंतप्रधान नरेंद्र मोदी यांनी रविवारी बंगळुरू येथील आर्ट ऑफ लिव्हिंग इंटरनॅशनल सेंटरला भेट देऊन संस्थेच्या ४५ व्या वर्धापनदिन सोहळ्यात सहभाग नोंदवला. या ऐतिहासिक प्रसंगी पंतप्रधानांच्या हस्ते नवनिर्मित 'ध्यान मंदिर' या भव्य वास्तूचे लोकार्पण करण्यात आले. हा सोहळा आध्यात्मिक गुरु श्री श्री रविशंकर यांच्या ७० व्या वाढदिवसाच्या निमित्ताने आयोजित करण्यात आला होता, ज्यामध्ये देश-विदेशातील हजारो अनुयायी आणि मान्यवर उपस्थित होते.

 

 

 

या सोहळ्याला संबोधित करताना पंतप्रधान मोदींनी समाजाच्या शक्तीवर विशेष भर दिला. ते म्हणाले की, समाज हा राजकारण आणि सरकारपेक्षा नेहमीच अधिक सामर्थ्यवान असतो. जेव्हा एखादी संस्था निस्वार्थ भावनेने जनसेवेचे कार्य करते, तेव्हा समाज स्वतःहून त्यांच्याशी जोडला जातो. गेल्या ४५ वर्षांत आर्ट ऑफ लिव्हिंगने लावलेले हे रोपटे आज एका विशाल वटवृक्षाप्रमाणे विस्तारले असून, जगभरातील करोडो लोकांच्या आयुष्यात सकारात्मक परिवर्तन घडवून आणले आहे, अशा शब्दांत त्यांनी श्री श्री रविशंकर यांच्या कार्याचे कौतुक केले.

 

 

 

 

पंतप्रधानांनी भारताच्या आध्यात्मिक वारशाचा गौरव करताना सांगितले की, आज संपूर्ण जग शांतता आणि मानसिक आरोग्यासाठी भारताच्या प्राचीन ज्ञानपरंपरेकडे, विशेषतः योग आणि ध्यानाकडे वळत आहे. आर्ट ऑफ लिव्हिंगने ही भारतीय संस्कृती आणि मूल्ये जागतिक स्तरावर नेण्याचे महत्त्वपूर्ण काम केले आहे. यासोबतच त्यांनी निसर्ग संवर्धन, जलशक्ती अभियान आणि नैसर्गिक शेती यांसारख्या सामाजिक विषयांवरही भाष्य करत, विकसित भारताच्या निर्मितीसाठी आध्यात्मिक संस्थांची भूमिका अत्यंत महत्त्वाची असल्याचे नमूद केले. १८२ देशांतील प्रतिनिधींच्या उपस्थितीत पार पडलेला हा सोहळा जागतिक एकात्मतेचे प्रतीक ठरला.