शेअर बाजारात मोठी घसरण; मोदींच्या आवाहनानंतर गुंतवणूकदारांमध्ये भीतीचे वातावरण

stock market investors आठवड्याच्या पहिल्याच दिवशी सोमवारी भारतीय शेअर बाजारात मोठी घसरण पाहायला मिळाली. बाजार उघडताच बीएसई सेन्सेक्स आणि एनएसई निफ्टी या दोन्ही प्रमुख निर्देशांकांमध्ये मोठी पडझड झाली. वाढत्या कच्च्या तेलाच्या किमती, मध्य-पूर्वेतील तणाव आणि जागतिक अनिश्चिततेमुळे गुंतवणूकदारांमध्ये भीतीचे वातावरण निर्माण झाले आहे. त्यातच पंतप्रधान नरेंद्र मोदी यांनी नागरिकांना सोने खरेदी टाळण्याचे तसेच पेट्रोल आणि डिझेलची बचत करण्याचे केलेले आवाहन बाजारासाठी धक्कादायक ठरल्याचे मानले जात आहे.

 

 

 

बॉम्बे स्टॉक एक्सचेंजचा ३० शेअर्सचा सेन्सेक्स निर्देशांक मागील बंद भाव ७७,३२८ च्या तुलनेत तब्बल ९४४ अंकांनी घसरून ७६,६३८ वर उघडला. बाजार सुरू झाल्यानंतर काही मिनिटांतच विक्रीचा दबाव आणखी वाढला आणि सेन्सेक्स ७६,३६३ पर्यंत खाली आला. दुसरीकडे, नॅशनल स्टॉक एक्सचेंजचा निफ्टी निर्देशांकही २४,१७६ च्या मागील बंद पातळीवरून घसरत २३,९७० वर उघडला आणि त्यानंतर आणखी घसरून २३,८९५ पर्यंत खाली आला.

शेअर बाजारातील या घसरणीमागे अनेक कारणे असल्याचे तज्ज्ञांचे मत आहे. पंतप्रधान मोदी यांनी देशवासियांना सध्या सोने खरेदी टाळण्याचे आणि इंधनाची बचत करण्याचे आवाहन केले. आपल्या शेजारी युद्धजन्य परिस्थिती निर्माण झाल्याने त्याचा परिणाम भारतासह संपूर्ण जगावर होत असल्याचे त्यांनी नमूद केले. या वक्तव्यानंतर गुंतवणूकदारांमध्ये आर्थिक अनिश्चिततेबाबत चिंता वाढल्याचे दिसून आले.

याशिवाय अमेरिका आणि इराण यांच्यातील शांतता चर्चेत पुन्हा एकदा प्रगती न झाल्याने मध्य-पूर्वेतील तणाव अधिक तीव्र झाला आहे. त्यामुळे आंतरराष्ट्रीय बाजारात कच्च्या तेलाच्या किमतींमध्ये मोठी वाढ झाली. ब्रेंट क्रूडच्या किमतीत एकाच दिवसात तीन टक्क्यांहून अधिक वाढ झाल्याने महागाई वाढण्याची भीती निर्माण झाली आहे. याचा थेट परिणाम भारतीय शेअर बाजारावर दिसून आला.

सोमवारच्या व्यवहारात जवळपास सर्वच क्षेत्रांमध्ये विक्रीचा दबाव पाहायला मिळाला. आयटी, बँकिंग, औषधनिर्मिती आणि धातू क्षेत्रातील अनेक दिग्गज कंपन्यांचे शेअर्स घसरले. Tata Consultancy Services, Infosys, Tech Mahindra, Sun Pharmaceutical Industries, Tata Steel, ICICI Bank, Kotak Mahindra Bank आणि ITC Limited यांसारख्या प्रमुख कंपन्यांचे शेअर्स तोट्यात व्यवहार करत होते.

सर्वाधिक घसरण झालेल्या शेअर्समध्ये Titan Company चा शेअर सुमारे ६.५० टक्क्यांनी घसरला.stock market investors त्याचप्रमाणे InterGlobe Aviation, State Bank of India, Bharti Airtel आणि One 97 Communications यांच्या शेअर्समध्येही मोठी घसरण दिसून आली. मिडकॅप आणि स्मॉलकॅप कंपन्यांमध्येही विक्रीचा दबाव कायम राहिल्याने गुंतवणूकदारांचे मोठे नुकसान झाले. जागतिक परिस्थिती, वाढते तेल दर आणि आर्थिक अनिश्चितता यामुळे आगामी काही दिवस शेअर बाजारात अस्थिरता कायम राहण्याची शक्यता तज्ज्ञांनी व्यक्त केली आहे.