दोन गाड्या, UPI आणि गेम ओव्हर! शुभेंदूंच्या PA चे मारेकरी 'असे' अडकले जाळ्यात

chandranath-rath-murder : पश्चिम बंगालचे मुख्यमंत्री सुवेंदू अधिकारी यांचे सहकारी चंद्रनाथ रथ यांच्या हत्येप्रकरणी किमान तीन जणांना अटक करण्यात आली आहे. पश्चिम बंगाल, उत्तर प्रदेश आणि बिहार पोलिसांच्या संयुक्त कारवाईत विशाल श्रीवास्तव, राज सिंग आणि मयंक मिश्रा यांना अटक करण्यात आली. या तिघांनाही उत्तर प्रदेश आणि बिहारमधून अटक करण्यात आली. चंद्रनाथ रथ यांची हत्या ६ मे रोजी रात्री २४ परगणा जिल्ह्यात झाली होती. यानंतर, पोलिसांनी संशयितांना पकडण्यासाठी शोधमोहीम सुरू केली आणि एका आठवड्याच्या आत त्यांना यश आले.

 

 

 

टोल प्लाझामधील सीसीटीव्ही फुटेज तपासल्यावर पोलिसांना संशयितांबद्दल एक मोठा सुगावा लागला. प्राथमिक तपासात असे दिसून आले की, एक सिल्व्हर निसान मायक्रा कार रथ यांच्या एसयूव्हीसमोर आली होती. रथ यांनी आपले वाहन थांबवले आणि तोपर्यंत दुचाकीवरून आलेल्या हल्लेखोरांनी गोळीबार सुरू केला होता. चंद्रनाथ रथ यांना तीन गोळ्या लागल्या आणि नंतर त्यांचा मृत्यू झाला. आरोपींनी त्यांची मायक्रा कार सोडून दिली आणि दुसऱ्या लाल रंगाच्या कारमधून व एका मोटरसायकलवरून पळून गेले. त्यानंतर पोलिसांनी त्या कारचा शोध सुरू केला. रविवारी, मयंक राज मिश्रा आणि विशाल यांना बिहारमधील बक्सर येथे अटक करण्यात आली, तर राज सिंग याला उत्तर प्रदेशातील बलिया येथे पकडण्यात आले.

जेव्हा पोलिसांनी टोल प्लाझावरील सीसीटीव्ही फुटेज तपासले, तेव्हा त्यांना आढळले की ती कार बरेलीजवळील एका टोल प्लाझामधून बाहेर पडली होती. कारमधील लोकांनी यूपीआयद्वारे पेमेंटही केले होते. कारमध्ये तीन जण होते. यामुळे पोलिसांना एक महत्त्वाचा दुवा मिळाला आणि शोधमोहीम अधिक तीव्र करण्यात आली. यूपीआय पेमेंटमुळे पोलिसांना आरोपींची नावे समजली.

पोलिसांनी सांगितले की, अटक केलेले तिन्ही आरोपी व्यावसायिक मारेकरी आहेत. ते पैशासाठी लोकांची हत्या करतात. विशाल हा बिहारमधील बक्सरचा रहिवासी असून, इतर दोघे उत्तर प्रदेशातील आहेत. विशालवर खून आणि दरोड्यासह किमान १५ गुन्हे दाखल आहेत. आरोपींना आज बंगालमधील बारासात न्यायालयात हजर केले जाईल.

 

एका वरिष्ठ पोलीस अधिकाऱ्याने सांगितले की, या प्रकरणातील डिजिटल पुरावे आणि आंतरराज्यीय संबंध तपासल्यानंतर तपास अधिकाऱ्यांनी ही कारवाई केली आहे. ते म्हणाले, "हे एक मोठे यश आहे. तपासात असे दिसून आले की हल्लेखोर पश्चिम बंगालबाहेरील होते. तांत्रिक पाळत, डिजिटल ट्रॅकिंग आणि इतर माहितीच्या आधारे एसआयटीच्या सदस्यांना उत्तर प्रदेश आणि बिहारमध्ये पाठवण्यात आले होते." त्यांनी सांगितले की, या हत्येचे नियोजन आणि अंमलबजावणी करण्यात किमान आठ जण सामील होते. पोलिसांचा असा विश्वास आहे की, हल्लेखोरांनी रथ यांना लक्ष्य करण्यापूर्वी परिसराची सविस्तर पाहणी केली होती.