उष्णता आणि प्रदूषणावर तोडगा; भोपाळमध्ये आले ‘अल्गी ट्री’

भोपळ, 

algae tree वाढते प्रदूषण, उष्णतेच्या लाटा आणि पर्यावरणीय संकटाच्या पार्श्वभूमीवर मध्य प्रदेशची राजधानी भोपाळमध्ये पर्यावरण संरक्षणासाठी एक महत्त्वपूर्ण पाऊल उचलण्यात आले आहे. देशात प्रथमच वातावरणातील कार्बन डायऑक्साइड शोषून घेणारे अत्याधुनिक ‘अल्गी ट्री’ तंत्रज्ञान सार्वजनिक स्तरावर सुरू करण्यात आले आहे. हे आधुनिक तंत्रज्ञान अशोक गार्डन परिसरातील विवेकानंद पार्क येथे स्थापित करण्यात आले असून, शहरी प्रदूषणावर नियंत्रण मिळवण्यासाठी ते प्रभावी उपाय ठरेल, अशी अपेक्षा व्यक्त केली जात आहे.

 

 

 

 

हे तंत्रज्ञान मशरूम वर्ल्ड ग्रुप यांनी विकसित केले आहे. कंपनीच्या माहितीनुसार, ही एक सूक्ष्म शैवाल-आधारित प्रणाली असून ती वातावरणातील कार्बन डायऑक्साइड शोषून घेते आणि त्याऐवजी ऑक्सिजन बाहेर सोडते. कंपनीचा दावा आहे की ‘अल्गी ट्री’चे एक युनिट तब्बल २५ झाडांइतका कार्बन शोषून घेण्यास सक्षम आहे. यामुळे दरवर्षी सुमारे १.५ टन कार्बन उत्सर्जन कमी करण्यात मदत होऊ शकते. परिणामी, शहरांमधील हवेची गुणवत्ता सुधारण्यास आणि प्रदूषण कमी करण्यास मोठी मदत मिळू शकते.

कंपनीने सांगितले की हे तंत्रज्ञान विकसित करण्यासाठी जवळपास दोन वर्षांचा कालावधी लागला. या प्रकल्पावर ५० हून अधिक तज्ञ, संशोधक आणि अभियंत्यांनी सातत्याने संशोधन आणि चाचण्या केल्या. विशेष म्हणजे, कमी जागेत प्रभावीपणे कार्बन नियंत्रण करण्याच्या उद्देशाने ही प्रणाली तयार करण्यात आली आहे. त्यामुळे सार्वजनिक ठिकाणे, उद्याने, गजबजलेल्या बाजारपेठा, शैक्षणिक संस्था आणि जास्त वाहतूक असलेल्या भागांमध्ये हे तंत्रज्ञान सहजपणे बसवता येऊ शकते.

पर्यावरण तज्ज्ञांच्या मते, वेगाने वाढणारे शहरीकरण आणि वाहनांच्या वाढत्या धुरामुळे शहरांतील प्रदूषण दिवसेंदिवस गंभीर होत आहे. अशा परिस्थितीत ‘अल्गी ट्री’सारखी आधुनिक तंत्रज्ञाने शहरांमधील स्थानिक कार्बन भार कमी करण्यासाठी, तापमान संतुलित ठेवण्यासाठी आणि नागरिकांना स्वच्छ हवा उपलब्ध करून देण्यासाठी महत्त्वाची भूमिका बजावू शकतात.

भोपाळ हे तंत्रज्ञान सार्वजनिक स्तरावर लागू करणारे देशातील पहिले शहर ठरले आहे.algae tree स्थानिक नागरिकांमध्येही या उपक्रमाबद्दल उत्साहाचे वातावरण आहे. भविष्यात हे तंत्रज्ञान देशातील इतर प्रमुख शहरांमध्ये विस्तारण्याची योजना कंपनीने आखली आहे. हा प्रयोग यशस्वी ठरल्यास, येत्या काळात ‘अल्गी ट्री’ भारतातील प्रदूषण नियंत्रणासाठी एक प्रभावी आणि आधुनिक उपाय म्हणून उदयास येऊ शकतो.