पाकिस्तानच्या विजयाचा फुगा दहशतवाद्यांनी फोडला!

Confession from the Lashkar Platform ऑपरेशन सिंदूरनंतर पाकिस्तानकडून विजयाचे दावे केले जात असतानाच आता एका व्हिडिओमुळे वेगळे चित्र समोर आले आहे. एका मिळाल्याचा दावा करण्यात आलेल्या या व्हिडिओमध्ये लश्कर-ए-तोयबा संबंधित दहशतवाद्यांनी भारतीय कारवाईमुळे त्यांच्या तळांवर मोठे नुकसान झाल्याचे कथितरित्या मान्य केल्याचे दिसत आहे. या व्हिडिओनंतर पाकिस्तानच्या अधिकृत दाव्यांवर प्रश्न उपस्थित केले जात आहेत. मिळालेल्या माहितीनुसार, लश्करशी संबंधित सैफुल्ला खालिद नावाच्या दहशतवाद्याने फैसलाबादमध्ये आयोजित एका रॅलीदरम्यान भारताने मुरीदके येथील मरकज तय्यबा मुख्यालयावर हल्ला केल्याचा उल्लेख केला. त्याने हल्ल्यानंतर परिसरात मोठ्या प्रमाणावर विध्वंस झाल्याचे कथितपणे सांगितले. या कार्यक्रमात हाफिज सईद याच्या सुटकेच्या घोषणाही देण्यात आल्याची माहिती समोर आली आहे.

 

 

 

याचदरम्यान लश्करचा वरिष्ठ कमांडर म्हणून ओळखला जाणारा हाफिज अब्दुल रौफ याचाही एक व्हिडिओ चर्चेत आला आहे. त्यामध्ये त्याने दहशतवाद्यांच्या अंत्यसंस्कार कार्यक्रमाला पाकिस्तानी लष्करातील वरिष्ठ अधिकारी आणि प्रशासनातील काही व्यक्ती उपस्थित असल्याचा दावा केल्याचे सांगितले जात आहे. या वक्तव्यांमुळे पाकिस्तानमधील काही घटक आणि दहशतवादी संघटनांमधील संबंधांबाबत पुन्हा चर्चा सुरू झाली आहे.व्हिडिओमधील दाव्यांनुसार, भारतीय ड्रोन पाकिस्तानातील विविध भागांपर्यंत पोहोचल्याचेही नमूद करण्यात आले आहे. इस्लामाबाद, लाहोर आणि पेशावरपर्यंत ड्रोन दिसल्याची भीती व्यक्त करण्यात आल्याचे सांगितले जात आहे. याशिवाय नूर खान, शोरकोट, रहीम यार खान आणि बहावलपूर परिसरातील हवाई तळांवरही भारतीय कारवाई झाल्याचे दावे या व्हिडिओंमध्ये करण्यात आले आहेत.

 

 

दरम्यान, या सर्व दाव्यांबाबत अधिकृत पातळीवर स्वतंत्र पडताळणी झालेली नसून भारत किंवा पाकिस्तानकडून सर्व बाबींवर सविस्तर अधिकृत प्रतिक्रिया समोर आलेली नाही. मात्र, सोशल मीडियावर आणि वृत्तवाहिन्यांवर या कथित व्हिडिओंची जोरदार चर्चा सुरू आहे.७ ते १० मेदरम्यान झालेल्या ‘ऑपरेशन सिंदूर’मध्ये भारतीय लष्कराने दहशतवादी तळ आणि काही लष्करी ठिकाणांना लक्ष्य केल्याचे सांगितले जात आहे. या कारवाईनंतर दोन्ही देशांमध्ये आरोप-प्रत्यारोप सुरू असतानाच आता समोर आलेल्या व्हिडिओंमुळे पाकिस्तानच्या दाव्यांवर नव्याने प्रश्नचिन्ह निर्माण झाले आहे.