हिमंता बिस्वा सरमा पुन्हा आसामच्या सत्तेवर!

Himanta Biswa Sarma Oath Ceremony हिमंता बिस्वा सरमा यांनी मंगळवारी दुसऱ्यांदा आसाम राज्याच्या मुख्यमंत्रीपदाची शपथ घेत नवा इतिहास रचला. सलग दोन कार्यकाळ मुख्यमंत्री राहणारे ते राज्यातील पहिले बिगर-काँग्रेस नेते ठरले आहेत. गुवाहाटी येथे आयोजित भव्य शपथविधी सोहळ्यात राज्यपाल लक्ष्मण प्रसाद आचार्य यांनी त्यांना पद आणि गोपनीयतेची शपथ दिली.या सोहळ्याला नरेंद्र मोदी, अमित शाह, राजनाथ सिंह आणि निर्मला सीतारामन यांच्यासह भाजप आणि एनडीएतील अनेक वरिष्ठ नेत्यांची उपस्थिती होती. देशभरातील विविध राज्यांचे मुख्यमंत्री, उपमुख्यमंत्री आणि केंद्रीय मंत्रीही या कार्यक्रमासाठी गुवाहाटीत दाखल झाले होते. त्यामुळे संपूर्ण परिसरात कडक सुरक्षा व्यवस्था तैनात करण्यात आली होती.

 

 

आसाम विधानसभा निवडणुकीत एनडीएला स्पष्ट बहुमत मिळाल्यानंतर हिमंता बिस्वा सरमा यांची एनडीए विधिमंडळ पक्षाच्या नेतेपदी निवड करण्यात आली होती. त्यानंतर राज्यपालांनी त्यांना सरकार स्थापनेसाठी निमंत्रण दिले. आसाममध्ये एनडीए सरकारचा हा सलग तिसरा कार्यकाळ ठरला आहे. २०१६ मध्ये भाजपने प्रथमच राज्यात सत्ता मिळवली होती, त्यानंतर २०२१ मध्ये हिमंता बिस्वा सरमा मुख्यमंत्री झाले आणि आता त्यांनी पुन्हा सत्तेची सूत्रे हाती घेतली आहेत.मुख्यमंत्रीपदाच्या शपथविधीसोबतच काही वरिष्ठ नेत्यांनी मंत्रीपदाची शपथ घेतली. यात रामेश्वर तेली, अतुल बोरा, चरण बोरो आणि अजंता निओग यांचा समावेश आहे. नव्या मंत्रिमंडळात प्रादेशिक आणि सहयोगी पक्षांनाही प्रतिनिधित्व देण्यात आले आहे.

 

 

हिमंता बिस्वा सरमा यांचा राजकीय प्रवासही तितकाच चर्चेचा राहिला आहे. त्यांनी २०१५ मध्ये काँग्रेस पक्ष सोडून भाजपमध्ये प्रवेश केला होता. त्यावेळी ईशान्य भारतात भाजपची ताकद मर्यादित होती. मात्र, सरमा यांनी प्रादेशिक पक्षांना एकत्र आणत भाजपचा प्रभाव वाढवण्यासाठी महत्त्वाची भूमिका बजावली. भाजपने त्यांच्यावर ईशान्य लोकशाही आघाडीच्या समन्वयाची जबाबदारी सोपवली होती आणि त्यानंतर पक्षाला अनेक राज्यांत यश मिळाले. गुवाहाटीमध्ये शिक्षण घेतलेल्या हिमंता बिस्वा सरमा यांनी राज्यशास्त्रात पदव्युत्तर शिक्षण पूर्ण केले असून त्यांनी कायद्याचे शिक्षणही घेतले आहे. काही काळ त्यांनी वकिलीही केली. विद्यार्थी चळवळीतून त्यांनी राजकारणात प्रवेश केला आणि नंतर काँग्रेसमार्फत विधानसभा निवडणुकीत विजय मिळवत मुख्य प्रवाहातील राजकारणात स्वतःची ओळख निर्माण केली. जलुकबारी मतदारसंघातून ते सातत्याने निवडून येत असून आसामच्या राजकारणातील प्रभावशाली चेहरा म्हणून त्यांची ओळख निर्माण झाली आहे.