नीट परीक्षेसाठी विद्यार्थी ‘पुन्हा त्याच रणांगणात'

NEET Exam वैद्यकीय शिक्षणाचे स्वप्न डोळ्यांत साठवत प्रखर उन्हात परीक्षा देणाऱ्या हजारो विद्यार्थ्यांवर पुन्हा एकदा अनिश्चिततेचे सावट आले आहे. कथित पेपरफुटी प्रकरणानंतर केंद्र सरकारने 'नीट' ही वैद्यकीय प्रवेश परीक्षा रद्द करण्याचा मोठा निर्णय घेतल्याने नागपुरातील विद्यार्थी, पालक आणि शिक्षकांमध्ये अस्वस्थता निर्माण झाली आहे. केंद्रीय तपास यंत्रणेकडून चौकशी सुरू करण्यात आली असून दोषींवर कठोर कारवाईचे संकेत देण्यात आले आहेत.

 

३ मे रोजी नागपुरासह देशातील विविध शहरांमध्ये ही परीक्षा पार पडली होती. शहरातील ६४ केंद्रांवर १० ते १२ हजार विद्यार्थ्यांनी परीक्षा दिली. कठोर नियम, तपासणी आणि उष्णतेच्या तडाख्यात विद्यार्थ्यांनी परीक्षा पूर्ण केली होती. मात्र पेपरफुटीच्या आरोपांनंतर अखेर परीक्षा रद्द करण्यात आली.

या निर्णयामुळे आता विद्यार्थ्यांना पुन्हा एकदा तयारी करून परीक्षा द्यावी लागणार आहे. विशेषतः बाहेरगावाहून नागपुरात आलेल्या विद्यार्थ्यांवर राहणी, अन्न आणि शिक्षणाचा अतिरिक्त आर्थिक भार पडणार आहे. पालकांनाही मानसिक आणि आर्थिक ताणाचा सामना करावा लागत आहे.

NEET Exam  राष्ट्रीय परीक्षा संस्थेने स्पष्ट केले आहे की विद्यार्थ्यांना नव्याने अर्ज करण्याची आवश्यकता नाही. नवीन परीक्षा वेळापत्रक आणि प्रवेशपत्रे लवकरच अधिकृत संकेतस्थळावर प्रसिद्ध करण्यात येणार आहेत. दरम्यान, वैद्यकीय महाविद्यालयांच्या प्रवेश प्रक्रियेवरही या निर्णयाचा परिणाम होणार असून प्रवेश प्रक्रियेला मोठा विलंब होण्याची शक्यता आहे.