पाकिस्तानी गँगस्टरशी संबंधाच्या संशयावरून एटीएसचा गोंडपिपरीत छापा!

ATScha Gondpiprit Raid पाकिस्तानस्थित गँगस्टर शाहझाद भट्टी याच्याशी संपर्क असल्याच्या संशयावरून एका व्यक्तीची चौकशी करण्यासाठी नागपूर परिक्षेत्राच्या दहशतवाद विरोधी पथक बुधवारी चंद्रपूर जिल्ह्यातील गोंडपिपरी तहसीलमध्ये पोहोचले. वरिष्ठ पोलिस अधिकाऱ्याने या कारवाईची माहिती दिली. ​एटीएसने बुधवारी मुंबईसह राज्यभरात ४० हून अधिक ठिकाणी एकाच वेळी छापे टाकले गेले. परदेशातून टोळी चालवणारा भट्टी, सोशल मीडियाच्या माध्यमातून भारतातील तरुणांना देशविरोधी कारवायांसाठी भडकवण्याचा प्रयत्न करीत असल्याचा आरोप आहे. हे छापे मुंबई, अकोला, नांदेड, पुणे आणि नागपूर विभागासह (चंद्रपूर जिल्हा) इतर विविध ठिकाणी टाकण्यात आले.

 

 

 

​भट्टी आणि त्याच्या सिंडिकेटच्या संपर्कात असलेल्या काही व्यक्तींच्या संशयास्पद हालचालींबाबत एटीएसला खात्रीशीर माहिती मिळाली होती. या माहितीच्या आधारे, नागपूर एटीएसचे पथक गोंडपिपरीत पोहोचले आणि एका संशयित व्यक्तीला चौकशीसाठी ताब्यात घेतले. एटीएस अधिकाऱ्यांनी या व्यक्तीची सुमारे एक तास कसून चौकशी केली. ​पथकाने त्याचे सोशल मीडिया अकाऊंट्स, फोन आणि इतर साहित्याची सखोल तपासणी केली. तपासादरम्यान कोणतीही संशयास्पद बाब किंवा धोका आढळला नसल्याने, त्या व्यक्तीला सोडून देण्यात आल्याची माहिती वरिष्ठ पोलिस अधिकाऱ्याने दिली.