मोठी कारवाई: नाशिकसह राज्यात एटीएसचे ४० ठिकाणी छापे!

ats-conducts-raids : संपूर्ण महाराष्ट्र राज्यात आज पहाटेपासूनच दहशतीचे आणि खळबळजनक वातावरण पाहायला मिळाले, कारण महाराष्ट्र दहशतवादविरोधी पथकाने (ATS) नाशिकसह राज्याच्या विविध भागांत एकाच वेळी 'मेगा कोम्बिंग ऑपरेशन' राबवले आहे. दिल्ली पोलिसांनी दिलेल्या विशेष गोपनीय माहितीनुसार, नाशिक, मालेगाव, जळगाव, पालघर, अकोला आणि अहिल्यानगर अशा तब्बल ४० हून अधिक ठिकाणी एकाच वेळी छापे टाकण्यात आले. या कारवाईचे स्वरूप इतके गोपनीय होते की स्थानिक प्रशासनालाही याची पूर्वकल्पना नव्हती. विशेषतः जुन्या नाशिक भागातून एटीएसने दोघा संशयित तरुणांना ताब्यात घेतले असून, त्यांचा तिसरा साथीदार पोलिसांना गुंगारा देऊन पसार झाला आहे.

 

 

 

 

या संपूर्ण छापासत्राचे मुख्य कारण म्हणजे पाकिस्तानातील लाहोरचा कुख्यात गँगस्टर शहजाद भट्टी, जो सध्या दुबईमध्ये आश्रयाला आहे. धक्कादायक बाब अशी की, भट्टी दुबईतून केवळ गुन्हेगारी साम्राज्यच चालवत नाही, तर तो सोशल मीडियाच्या माध्यमातून महाराष्ट्रातील सुशिक्षित तरुणांना चक्क सरकारी नोकरीची आमिषे दाखवून त्यांना देशविरोधी कारवायांकडे वळवत असल्याचे समोर आले आहे. एटीएसने दिलेल्या माहितीनुसार, या आंतरराष्ट्रीय सिंडिकेटमध्ये राज्यातील तब्बल ५७ जणांची नावे निष्पन्न झाली असून, त्यापैकी ४७ जणांची सध्या कसून चौकशी सुरू आहे. या तरुणांना भट्टीने डिजिटल माध्यमातून चिथावणी देऊन त्यांना विघातक कृत्ये करण्यासाठी प्रवृत्त केल्याचा संशय व्यक्त केला जात आहे.

 

नाशिक आणि मालेगावमध्ये सुरू असलेल्या या कारवाईत पोलिसांनी अनेक संशयित घरांची झडती घेतली असून, तिथून हाय-टेक लॅपटॉप, अत्याधुनिक मोबाईल फोन आणि काही अत्यंत गोपनीय नकाशांची कागदपत्रे जप्त केली आहेत. ताब्यात घेतलेल्या तरुणांना पुढील तपासासाठी तातडीने मुंबई एटीएसच्या मुख्यालयात हलवण्यात आले आहे. शहजाद भट्टी हा मूळचा लाहोरचा असला तरी त्याचे संबंध थेट जागतिक दहशतवादी संघटनांशी असून, भारतातील शांतता भंग करण्यासाठी तो तरुणांचा वापर करत आहे. या पार्श्वभूमीवर नाशिक परिक्षेत्रात सध्या 'हायअलर्ट' जारी करण्यात आला असून, सर्वत्र कडक पोलीस बंदोबस्त तैनात करण्यात आला आहे. एटीएसच्या या धडक कारवाईमुळे गुन्हेगारी वर्तुळात मोठी घबराट पसरली आहे.