आझम खान यांना २ वर्षांच्या तुरुंगवासाची शिक्षा

Azam Khan Sentenced to Imprisonment समाजवादी पक्षाचे ज्येष्ठ नेते आझम खान यांच्या अडचणी पुन्हा वाढल्या असून उत्तर प्रदेशातील रामपूर येथील खासदार-आमदार न्यायालयाने त्यांना दोन वर्षांच्या तुरुंगवासाची शिक्षा सुनावली आहे. याशिवाय न्यायालयाने त्यांच्यावर ५ हजार रुपयांचा दंडही ठोठावला आहे. सात वर्षांपूर्वी केलेल्या एका वादग्रस्त वक्तव्याप्रकरणी हा निर्णय देण्यात आला. ही कारवाई २०१९ च्या लोकसभा निवडणुकीदरम्यान केलेल्या भाषणाशी संबंधित आहे. निवडणूक प्रचारसभेत बोलताना आझम खान यांनी जिल्हाधिकारी आणि पोलिस अधिकाऱ्यांबाबत वादग्रस्त टिप्पणी केल्याचा आरोप होता. त्यांच्या भाषणाचा व्हिडिओ सोशल मीडियावर व्हायरल झाल्यानंतर निवडणूक आचारसंहितेचे उल्लंघन केल्याप्रकरणी तक्रार दाखल करण्यात आली होती.

 

 

 

तक्रारीनंतर प्रकरणाची सुनावणी खासदार-आमदार न्यायालयात सुरू होती. न्यायालयाने उपलब्ध पुरावे आणि व्हिडिओच्या आधारे आझम खान यांना दोषी ठरवत शिक्षा सुनावली. या निकालामुळे उत्तर प्रदेशातील राजकीय वर्तुळात मोठी चर्चा सुरू झाली आहे. दरम्यान, आझम खान सध्या इतर प्रकरणांमुळे रामपूर कारागृहातच आहेत. त्यांच्या विरोधातील विविध प्रकरणांमुळे ते गेल्या काही वर्षांपासून सतत चर्चेत राहिले आहेत. आता न्यायालयाच्या या नव्या निर्णयामुळे त्यांच्या राजकीय अडचणी आणखी वाढण्याची शक्यता व्यक्त केली जात आहे.