कटकट मिटली, चिंता सुटली; महिलांसाठी १० कोटींची तिजोरी फुटली!

collateral-free-loans-available : दिल्ली सरकार राजधानीतील महिलांच्या नेतृत्वाखालील स्टार्टअप्स आणि बचत गटांना (SHGs) १० कोटी रुपयांपर्यंतचे तारणविरहित कर्ज देणार आहे. मुख्यमंत्री रेखा गुप्ता यांनी रविवारी ही घोषणा केली. त्यांनी पुढे सांगितले की, महिलांनी बनवलेल्या देशी उत्पादनांना व्यापक बाजारपेठेत प्रोत्साहन देण्यासाठी शहरातील मॉल्स आणि प्रमुख शॉपिंग कॉम्प्लेक्समध्ये विशेष व्यासपीठंही उपलब्ध करून दिली जातील.

 

 

 

 

 

 

मुख्यमंत्री रेखा गुप्ता यांनी एका निवेदनात म्हटले आहे, "राजधानीतील महिलांना आत्मनिर्भर, उद्योजक आणि आर्थिकदृष्ट्या सक्षम बनवण्यासाठी व्यापक प्रयत्न केले जात आहेत. महिला बचत गट आणि स्टार्टअप्ससाठी १० कोटी रुपयांपर्यंतच्या तारणविरहित कर्जाची व्यवस्था करण्यात आली आहे."

 

 

मुख्यमंत्री म्हणाल्या की, दिल्ली सरकार अशा कर्जांसाठी हमी देईल. शनिवारी रोहिणी येथे आयोजित दोन दिवसीय 'मेगा सेल्फ-हेल्प ग्रुप (एसएचजी) मेळा-२०२६' च्या उद्घाटन समारंभात बोलताना त्या म्हणाल्या की, पंतप्रधान नरेंद्र मोदी 'व्होकल फॉर लोकल', 'आत्मनिर्भर भारत' आणि 'एक जिल्हा, एक उत्पादन' या संकल्पनांना सातत्याने प्रोत्साहन देत आहेत.

 

 

मुख्यमंत्री म्हणाल्या की, महिलांनी बनवलेल्या देशी उत्पादनांना प्रोत्साहन देण्यासाठी आणि त्यांना व्यापक बाजारपेठेशी जोडण्यासाठी हा स्वयंसहायता गट मेळा एक प्रयत्न आहे. या मेळ्यात जवळपास २४ स्वयंसहायता गटांनी सहभाग घेतला होता. या मेळ्यात हस्तकला, ​​क्रोशेकाम, खादी, घरगुती उत्पादने, खाद्यपदार्थ आणि इतर हस्तनिर्मित वस्तू प्रदर्शित करून विकण्यात आल्या.