अनन्याची ‘राष्ट्रीय एअर पिस्तोल शूटिंग’ स्पर्धेसाठी निवड

Ananya Selected for National Air Pistol Shooting खेळाडूंच्या अंगी जिद्द आणि योग्य मार्गदर्शन असेल तर ग्रामीण भागातील मुलेही राष्ट्रीय पातळीवर आपली चमक दाखवू शकतात, हे पुन्हा एकदा सिद्ध झाले आहे. मुंबई येथे नुकत्याच पार पडलेल्या राज्यस्तरीय महाराष्ट्र एअर पिस्तोल शूटिंग चॅम्पियनशिप स्पर्धेत आलापल्लीची कन्या अनन्या अविनाश सामलवार हिने घवघवीत यश संपादन केले आहे. या कामगिरीच्या जोरावर तिची आगामी राष्ट्रीय एअर पिस्तोल शूटिंग स्पर्धेसाठी निवड झाली आहे. अनन्या ही त्रिमूर्ती पावन प्रतिष्ठान संचलित त्रिमूर्ती पब्लिक स्कूलची विद्यार्थिनी आहे. तिने या राज्यस्तरीय स्पर्धेत ‘10 मीटर एअर पिस्तोल’ प्रकारात सहभाग घेतला होता. अत्यंत चुरशीच्या ठरलेल्या या स्पर्धेत तिने 400 पैकी 342 गुण मिळवून हे दैदिप्यमान यश आपल्या नावावर केले.

 

 

 

 

राज्य पातळीवर मिळालेल्या या यशामुळे अनन्याची थेट जून महिन्यात होणार्‍या राष्ट्रीय स्पर्धेसाठी निवड झाली आहे. तिच्या या यशामागे तिची कठोर मेहनत आणि त्रिमूर्ती पावन प्रतिष्ठानचे पदाधिकारी व शिक्षकांचे मोलाचे मार्गदर्शन लाभले आहे. यामध्ये त्रिमूर्ती पावन प्रतिष्ठानच्या अध्यक्षा अ‍ॅड. सुमीती गाडगे पाटील, उपाध्यक्षा स्नेहल, सहसचिव श्रुती आमले पाटील, प्राचार्य अरविंद देशमुख, क्रीडा शिक्षक छबुराव काळे या सर्वांनी अनन्याला वेळोवेळी प्रोत्साहन देत तिच्याकडून उत्तम सराव करून घेतला.

अनन्याने क्रीडा क्षेत्रात मिळवलेल्या या राष्ट्रीय स्तरावरील यशामुळे संपूर्ण गडचिरोली जिल्ह्याची मान अभिमानाने उंचावली आहे. तिच्या या यशाची वार्ता समजताच आलापल्ली परिसरासह संपूर्ण जिल्ह्यातून तिच्यावर नागरिकांकडून, क्रीडाप्रेमींकडून आणि लोकप्रतिनिधींकडून अभिनंदनाचा व कौतुकाचा वर्षाव होत आहे. आगामी राष्ट्रीय स्पर्धेतही ती अशीच चमकदार कामगिरी करेल, असा विश्‍वास सर्वांकडून व्यक्त केला जात आहे.