बिहारमध्ये सापडले सोन्यासह दुर्मिळ खनिजांचे साठे!

Mineral deposits discovered in Bihar बिहारमध्ये दुर्मिळ आणि मौल्यवान खनिजांचे साठे आढळल्याने राज्याच्या औद्योगिक आणि आर्थिक विकासाला नवे बळ मिळण्याची शक्यता निर्माण झाली आहे. राज्याचे खाण आणि भूविज्ञान मंत्री प्रमोद कुमार यांनी मंगळवारी याबाबत माहिती देताना सांगितले की, केंद्र सरकारने बिहारमधील १४ महत्त्वाच्या खाण ब्लॉक्सची ओळख पटवली असून त्यांचा लवकरच लिलाव केला जाणार आहे. या खनिजांमध्ये पॅलेडियम, टायटॅनियम, ग्लॉकोनाइट, कोबाल्ट यांसारख्या दुर्मिळ आणि औद्योगिकदृष्ट्या अत्यंत महत्त्वाच्या खनिजांचा समावेश आहे. बांका जिल्ह्यात कोबाल्टचे साठे सापडले असून त्यासाठीही लवकरच खाणकाम प्रक्रिया सुरू होण्याची शक्यता आहे. तसेच भागलपूर जिल्ह्यातील बटेश्वरस्थान परिसरात दुर्मिळ मृदा मूलद्रव्यांचे महत्त्वपूर्ण संकेत मिळाले आहेत. या परिसरात क्रोमाइटचे साठेही आढळल्याचे सांगण्यात आले.

 

 

 

 

दुर्मिळ मृदा मूलद्रव्यांचा वापर संरक्षण क्षेत्र, इलेक्ट्रिक वाहने, स्मार्टफोन, संगणक, रडार प्रणाली आणि आधुनिक इलेक्ट्रॉनिक उपकरणांमध्ये मोठ्या प्रमाणावर केला जातो. त्यामुळे या खनिजांचे धोरणात्मक आणि आर्थिक महत्त्व खूप मोठे मानले जाते.दरम्यान, केंद्र सरकार नवादा जिल्ह्यातील व्हॅनेडियमयुक्त मॅग्नेटाइट आणि इल्मेनाइट खाणपट्ट्यांसह रोहतास जिल्ह्यातील ग्लॉकोनाइटच्या खाणींच्या लिलावाची प्रक्रिया सुरू करत आहे. सार्वजनिक क्षेत्रातील मेटल स्क्रॅप ट्रेड कॉर्पोरेशनने या खाणपट्ट्यांसाठी निविदा मागवल्या असून २० मेनंतर लिलाव प्रक्रिया वेग घेणार आहे.

राज्यातील विशेषतः झारखंड सीमेलगतच्या दक्षिण बिहार भागात मोठ्या प्रमाणावर खनिज शोधमोहीम सुरू आहे. हवाई सर्वेक्षण, उपग्रह चित्रांचे विश्लेषण आणि भूगर्भीय अभ्यासाच्या माध्यमातून विविध भागांतील खनिज संपत्तीचा शोध घेतला जात आहे.याशिवाय, जमुई जिल्ह्यातील सोनो परिसरात सोन्याचे साठे असल्याचे संकेत मिळाल्याची माहितीही मंत्र्यांनी दिली. या भागात सध्या सर्वेक्षण सुरू असून अंतिम अहवालाची प्रतीक्षा आहे. बांका जिल्ह्यातील पिंडारक भागात तांब्याचे साठेही आढळले असून त्याच्या व्यावसायिक खाणकामाच्या शक्यतांचा अभ्यास सुरू आहे.