“स्क्रिप्ट न ऐकता साईन, नशिबाने साथ सोडली!

Aamir Khan बॉलिवूडमधील ‘मिस्टर परफेक्शनिस्ट’ म्हणून ओळखला जाणारा अभिनेता आमिर खानने आपल्या करिअरच्या सुरुवातीच्या काळातील काही धक्कादायक अनुभव उघड केले आहेत. अलीकडेच एका संवाद सत्रात स्टँडअप कॉमेडियन Zakir Khan यांच्याशी बोलताना त्याने सांगितले की, त्याने आपल्या कारकिर्दीत फक्त दोनच चित्रपट असे केले होते, जे त्याने स्क्रिप्ट ऐकण्याआधीच साइन केले होते आणि दुर्दैवाने हे दोन्ही चित्रपट बॉक्स ऑफिसवर अपयशी ठरले.

 

 

आपल्या निवडक आणि विचारपूर्वक चित्रपट निवडीसाठी प्रसिद्ध असलेल्या आमिर खानने स्पष्ट केले की, सामान्यतः तो कोणताही चित्रपट स्वीकारताना त्या कथेशी भावनिकदृष्ट्या जोडला जातो का, याला सर्वाधिक महत्त्व देतो. कथा ऐकताना स्वतःला प्रेक्षक म्हणून पाहून ती कथा उत्साहित करते का, काहीतरी वेगळे देते का, याचा तो बारकाईने विचार करतो. मात्र करिअरच्या सुरुवातीला परिस्थिती आणि कुटुंबीयांच्या दबावामुळे काही निर्णय त्याला मनाविरुद्ध घ्यावे लागले, असे त्याने नमूद केले.

आमिर खानने सांगितले की ‘अव्वल नंबर’ आणि ‘तुम मेरे हो’ हे दोन चित्रपट असे होते, जे त्याने स्क्रिप्ट न ऐकताच स्वीकारले. यामागे प्रमुख कारण म्हणजे त्याचे वडील आणि निर्माते ताहिर हुसैन यांचा प्रभाव. वडिलांविषयी आदर आणि थोडी भीती असल्यामुळे त्यांच्या निर्णयाला नकार देणे त्याला शक्य झाले नाही, असेही त्याने स्पष्ट केले.

‘अव्वल नंबर’ या चित्रपटाबाबत बोलताना आमिरने सांगितले की, दिग्दर्शक देव आनंद त्याला भेटू इच्छित आहेत आणि प्रकल्पासाठी आधीच होकार देण्यात आला आहे, असे त्याच्या वडिलांनी सांगितले होते. सुरुवातीला स्क्रिप्ट ऐकण्याची इच्छा व्यक्त करूनही वडिलांच्या ठाम भूमिकेमुळे त्याने अखेर नकार न देता चित्रपट स्वीकारला.तर ‘तुम मेरे हो’ या चित्रपटासाठीही परिस्थिती वेगळी नव्हती. हा चित्रपट स्वतः ताहिर हुसैन निर्मित करत असल्याने आमिरने कथेबाबत विचारणा करण्याचा प्रयत्न केला, मात्र त्याला अपेक्षित प्रतिसाद मिळाला नाही. उलट, वडिलांनी त्याला आपल्या अनुभवाची आठवण करून देत कठोर शब्दांत समजावले. त्यानंतर दीर्घ चर्चा आणि मार्गदर्शनानंतर आमिरने पुन्हा एकदा स्क्रिप्ट न ऐकताच चित्रपटाला होकार दिला.या संपूर्ण अनुभवाकडे पाहताना आमिर खानने विनोदी शैलीत म्हटले की, प्रेक्षकांना ज्या काही चित्रपटांबद्दल नाराजी आहे, त्यासाठी त्याला जबाबदार धरता येईल, मात्र हे दोन चित्रपट त्याने पूर्णपणे अनभिज्ञ अवस्थेत स्वीकारले होते.आमिरच्या या खुलाशामुळे त्याच्या करिअरमधील सुरुवातीच्या संघर्षांची आणि कुटुंबीय प्रभावाची नवी बाजू समोर आली आहे.