नागपूर विभागाचा वास्तवदर्शी निकाल

विभागीय अधिकाऱ्यांच्या माहितीनुसार, यंदा राबविण्यात आलेल्या कॉपीमुक्त मोहिमेमुळे निकालावर मोठा परिणाम झाला. गोंदिया व वर्धा जिल्ह्यातील दोन केंद्रांवर सामूहिक कॉपी प्रकरण उघडकीस आले. या प्रकरणात २४३ विद्यार्थ्यांना नापास करण्यात आले असून संबंधित केंद्रांची मान्यता रद्द करण्यात आली. त्यामुळे एकूण निकालात घट झाली असल्याची शक्यता विभागीय अध्यक्ष

उत्तरपत्रिका तपासणीदरम्यान गोंदिया जिल्ह्यातील कोदुर्ली येथील माउली कनिष्ठ महाविद्यालयात १२५ तर, वर्धा जिल्ह्यातील समुद्रपूर तालुक्यातील जे. डी. चौधरी विद्यालयात ११८ विद्यार्थ्यांच्या जीवशास्त्र विषयाच्या उत्तरपत्रिकांमध्ये समान उत्तरे लिहिल्याचे निदर्शनास आले. सखोल चौकशी दरम्यान सामूहिक कॉपी झाल्याचे स्पष्ट झाले. या प्रकरणात संबंधित सर्व विद्यार्थ्यांना त्या विषयात अनुत्तीर्ण करण्यात आले असून दोन्ही परीक्षा केंद्रांची मान्यता कायमस्वरूपी रद्द करण्यात आली आहे. शिक्षण मंडळाचे नागपूर विभागीय अध्यक्ष डॉ. शिवलिंग पटवे यांनी सांगितले की, या गैरप्रकारात सहभागी शिक्षक, मुख्याध्यापक तसेच संस्थांवरही कठोर कारवाईची प्रक्रिया सुरू आहे. दरम्यान, गडचिरोली जिल्ह्यातील बोमलवार कनिष्ठ महाविद्यालयात भरारी पथकांनी केलेल्या कारवाईत ४२ विद्यार्थी कॉपी करताना पकडले गेले. त्यांनाही अनुत्तीर्ण करण्यात आले असून त्या केंद्रावरही कारवाईचा प्रस्ताव आहे.