पुढच्या वर्षीच्या IPL मध्ये खेळू शकतो पाकिस्तानचा 'हा' खेळाडू, कारण...

ipl-pakistani-players : पाकिस्तानचा माजी वेगवान गोलंदाज मोहम्मद आमिर पुन्हा एकदा चर्चेत आला असून, यावेळी कारण त्याची गोलंदाजी नसून त्याला मिळालेले ब्रिटिश नागरिकत्व आहे. आमिरला अधिकृतपणे ब्रिटिश पासपोर्ट मिळाल्याची माहिती समोर आली आहे, त्यामुळे त्याच्या आंतरराष्ट्रीय तसेच फ्रँचायझी क्रिकेटमधील भविष्याला नवे वळण मिळण्याची शक्यता निर्माण झाली आहे.

 

 

 

 

 

मिळालेल्या माहितीनुसार, काही वर्षांपूर्वी केलेल्या अर्जानंतर ब्रिटिश सरकारने आमिरचा पासपोर्ट मंजूर केला आहे. त्याची पत्नी आधीपासून ब्रिटिश नागरिक असल्याने या प्रक्रियेला गती मिळाल्याचे सांगितले जात आहे. आता ब्रिटिश नागरिक म्हणून तो जगभरातील लीगमध्ये परदेशी खेळाडू म्हणून सहभागी होऊ शकतो.

 

या निर्णयामुळे इंडियन प्रीमियर लीगमध्ये खेळण्याचा त्याचा मार्ग काही प्रमाणात खुला झाला आहे. आतापर्यंत पाकिस्तानी खेळाडूंना आयपीएलमध्ये सहभागी होण्यास बंदी आहे, मात्र आमिर आता पाकिस्तानी नव्हे तर ब्रिटिश नागरिक असल्याने त्याला परदेशी खेळाडू म्हणून गणले जाईल. त्यामुळे फ्रँचायझी संघ त्याच्याकडे लक्ष देऊ शकतात, असेही मानले जात आहे.

 

३६ वर्षीय मोहम्मद आमिरने गेल्या वर्षी आंतरराष्ट्रीय क्रिकेटमधून दुसऱ्यांदा निवृत्ती घेतली आहे. तरीही तो विविध टी-२० लीगमध्ये खेळत असून आपल्या स्विंग आणि डेथ ओव्हरमधील गोलंदाजीने अजूनही प्रभाव पाडत आहे. त्याने पाकिस्तानसाठी कसोटी, एकदिवसीय आणि टी-२० अशा सर्व प्रकारांमध्ये महत्त्वाची कामगिरी केली आहे.

 

सध्या तो इंग्लंडमध्ये असून आगामी काउंटी क्रिकेट हंगामात तो स्थानिक खेळाडू म्हणून खेळणार आहे. तसेच पाकिस्तान सुपर लीगमध्ये तो परदेशी खेळाडू म्हणून दिसणार आहे. त्याच्या अनुभवामुळे आणि टी-२० मधील कौशल्यामुळे आयपीएल फ्रँचायझींसाठी तो भविष्यात आकर्षक पर्याय ठरू शकतो.