सूर्यवंशीचा 'वैभव'शाली पराक्रम

vaibhav-suryavanshi : अवघ्या १५ वर्षांच्या वयात, वैभव सूर्यवंशीने आयपीएल २०२६ मध्ये एक असा पराक्रम केला आहे, जो अगदी सर्वात यशस्वी क्रिकेटपटूंनाही इतक्या लहान वयात साधता आलेला नाही. राजस्थान रॉयल्सच्या या युवा स्टारने लखनौ सुपर जायंट्सविरुद्धच्या सामन्यात एका आयपीएल हंगामात ५०० धावा पूर्ण करून इतिहास रचला. यासह, तो कोणत्याही टी२० स्पर्धेत ५०० धावा करणारा जगातील सर्वात तरुण खेळाडू ठरला.

 

 

 

 

 

 

जयपूरच्या सवाई मानसिंग स्टेडियमवर खेळल्या गेलेल्या सामन्यात, वैभवला हा टप्पा गाठण्यासाठी केवळ १४ धावांची गरज होती आणि त्याने १४ चेंडूंमध्येच हा टप्पा गाठला. या ऐतिहासिक कामगिरीसह, त्याने ऋषभ पंतचा विक्रमही मोडला. यापूर्वी, आयपीएलच्या एका हंगामात ५०० धावा करणारा सर्वात तरुण खेळाडू म्हणून ऋषभ पंतच्या नावावर विक्रम होता, ज्याने २०१८ मध्ये ही कामगिरी केली होती.

 

 

इतकेच नाही, तर वैभव सूर्यवंशी एकाच आयपीएल हंगामात ५० षटकार मारणारा पहिला भारतीय फलंदाजही ठरला आहे. यापूर्वी कोणत्याही भारतीय फलंदाजाने ही कामगिरी केली नव्हती. त्याने अवघ्या २३ चेंडूंमध्ये आपले अर्धशतक पूर्ण केले आणि लखनौच्या गोलंदाजांना अक्षरशः चिरडून टाकले. या सामन्यापूर्वी, आयपीएल २०२६ मध्ये वैभवने ४३ षटकार मारले होते. लखनौच्या गोलंदाजांविरुद्ध सात षटकार मारून वैभवने आपले नाव विक्रमांच्या पुस्तकात कोरले. वैभव १० षटकारांसह ९३ धावांवर बाद झाला. यामुळे एकाच आयपीएल हंगामातील त्याच्या षटकारांची एकूण संख्या ५३ झाली असून, त्याने आंद्रे रसेलला मागे टाकले आहे. आता वैभवकडे ख्रिस गेलचा विक्रम मोडण्याची मोठी संधी आहे. आयपीएलच्या एका हंगामात सर्वाधिक षटकारांचा विक्रम गेलच्या नावावर आहे. त्याने एकाच आयपीएल हंगामात ५९ षटकार मारले आहेत.

 

 

 

 

 

ख्रिस गेल - ५९

वैभव सूर्यवंशी - ५३

आंद्रे रसेल - ५२

ख्रिस गेल - ५१

 

यापूर्वी, प्रथम फलंदाजी करताना लखनौ सुपर जायंट्सने राजस्थानविरुद्ध एक मोठी धावसंख्या उभारली. ऑस्ट्रेलियन फलंदाज मिचेल मार्शच्या ९६ धावांच्या खेळीमुळे लखनौला २० षटकांत २२०/५ अशी मोठी धावसंख्या उभारता आली. जोश इंग्लिसचे ६० धावांचे योगदान होते.