‘कॉकरोच जनता पार्टी’चे भारतात 'एक्स अकाउंट' बंद

Cockroach Janata Party's Account Suspended सोशल मीडियावर गेल्या काही दिवसांपासून चर्चेत असलेल्या कॉकरोच जनता पार्टीला मोठा धक्का बसला आहे. ११ दशलक्षाहून अधिक फॉलोअर्स असलेल्या या गटाचे वरील अकाउंट भारतात बंद करण्यात आले आहे. या कारवाईनंतर सोशल मीडियावर विविध प्रतिक्रिया उमटू लागल्या आहेत. कॉकरोच जनता पार्टी, म्हणजेच सीजेपी, ही सोशल मीडियावर तयार झालेली एक चर्चित ऑनलाइन कम्युनिटी मानली जात होती. भारताच्या सरन्यायाधीशांच्या एका वक्तव्याच्या निषेधार्थ या गटाची सोशल मीडियावर मोठ्या प्रमाणात चर्चा सुरू झाली होती. अल्पावधीतच या अकाउंटचे फॉलोअर्स झपाट्याने वाढले आणि विविध प्लॅटफॉर्मवर त्यांची उपस्थिती मोठ्या प्रमाणात जाणवू लागली.

 

 

 

दरम्यान, सीजेपीचे संस्थापक अभिजीत दीपक यांनी यापूर्वी त्यांच्या इंस्टाग्राम अकाउंटबाबतही गंभीर दावा केला होता. त्यांच्या म्हणण्यानुसार, इंस्टाग्राम अकाउंट हॅक करण्याचा प्रयत्न करण्यात आला होता. तो प्रयत्न अयशस्वी ठरल्यानंतर अकाउंट बंद करण्यात आल्याचा आरोप त्यांनी केला होता. आता एक्स प्लॅटफॉर्मवरील अकाउंट भारतात बंद करण्यात आल्यानंतर या कारवाईमागील नेमके कारण काय, याबाबत विविध चर्चा सुरू झाल्या आहेत. मात्र अधिकृत स्तरावर अद्याप यासंदर्भात सविस्तर माहिती समोर आलेली नाही. सोशल मीडियावर या निर्णयावरून समर्थन आणि विरोध अशा दोन्ही प्रतिक्रिया पाहायला मिळत आहेत.