६ वर्षीय मुलीचा मृत्यू : दीनानाथ मंगेशकर रुग्णालयाला नोटीस

Deenanath Mangeshkar Hospital पुण्यातील दीनानाथ मंगेशकर रुग्णालयात झालेल्या एका सहा वर्षीय मुलीच्या मृत्यूप्रकरणी पुणे महानगरपालिकेने (पीएमसी) कठोर भूमिका घेत रुग्णालय प्रशासनाला नोटीस बजावली आहे. या प्रकरणाशी संबंधित सर्व वैद्यकीय कागदपत्रे आणि तपशीलवार वस्तुस्थितीदर्शक अहवाल २४ तासांच्या आत सादर करण्याचे निर्देश महापालिकेच्या आरोग्य विभागाने दिले आहेत. मुलीच्या मृत्यूनंतर शहरात वैद्यकीय निष्काळजीपणाचे आरोप होत असून या प्रकरणाची चौकशी सुरू करण्यात आली आहे.

 

 

१८ मे रोजी दीनानाथ मंगेशकर रुग्णालयात डोळ्यांच्या शस्त्रक्रियेच्या प्रक्रियेदरम्यान या ६ वर्षीय मुलीचा मृत्यू झाला. पूर्वी झालेल्या मोतीबिंदू शस्त्रक्रियेशी संबंधित तपासणी किंवा पुढील उपचारासाठी ती रुग्णालयात दाखल करण्यात आली होती. मात्र उपचारादरम्यान तिची प्रकृती बिघडली आणि दुर्दैवीरित्या तिचा मृत्यू झाला.

 

 

या घटनेनंतर मुलीच्या कुटुंबीयांनी रुग्णालयावर Deenanath Mangeshkar Hospital  गंभीर आरोप करत वैद्यकीय निष्काळजीपणाची तक्रार दाखल केली आहे. तसेच या प्रकरणाची सखोल चौकशी व्हावी आणि दोषींवर कारवाई व्हावी, अशी मागणीही त्यांनी केली आहे. याच पार्श्वभूमीवर अलंकार पोलीस ठाण्यातही तक्रार नोंदविण्यात आली असून पोलिसांनी संबंधित डॉक्टरांचे जबाब नोंदवले आहेत.महापालिकेच्या आरोग्य विभागाने दिलेल्या नोटिशीत रुग्णालयाने महाराष्ट्र नर्सिंग होम कायदा तसेच राज्य शासनाच्या मार्गदर्शक सूचनांचे पालन केले आहे की नाही, याबाबतही स्पष्ट अहवाल सादर करण्याचे निर्देश दिले आहेत. प्राथमिक माहितीनुसार, शवविच्छेदन पूर्ण झाल्यानंतर मुलीचा मृतदेह कुटुंबीयांच्या ताब्यात देण्यात आला असून कुटुंब मूळ गावी परतले आहे.दरम्यान, दीनानाथ मंगेशकर रुग्णालयाने या घटनेबाबत अधिकृत निवेदन देत ही घटना अत्यंत दुर्दैवी असल्याचे म्हटले आहे. तसेच रुग्णालयाने अंतर्गत चौकशी सुरू केली असून सर्व कागदपत्रे तपास यंत्रणांना उपलब्ध करून दिली जातील, असेही स्पष्ट केले आहे.या घटनेमुळे शहरातील आरोग्यसेवा व्यवस्थेवर पुन्हा एकदा प्रश्नचिन्ह निर्माण झाले असून वैद्यकीय निष्काळजीपणाच्या आरोपांवरून वातावरण तापले आहे. चौकशीच्या पुढील निष्कर्षांकडे आता सर्वांचे लक्ष लागले आहे.