धोनींच्या प्रभावामुळे सीएसके अडचणीत?

CSK in trouble due to Dhoni's influence इंडियन प्रीमियर लीग २०२६ मध्ये चेन्नई सुपर किंग्सचा निराशाजनक हंगाम संपल्यानंतर संघात मोठ्या बदलांची चर्चा सुरू झाली आहे. सलग तिसऱ्या हंगामात प्लेऑफमध्ये स्थान मिळवण्यात अपयशी ठरलेल्या सीएसकेमध्ये आता नेतृत्व आणि प्रशिक्षक व्यवस्थापनावर गंभीर प्रश्न उपस्थित केले जात आहेत. याच दरम्यान, एम.एस. धोनीमुळे एका संभाव्य प्रशिक्षकाने संघात येण्यास नकार दिल्याचा धक्कादायक दावा समोर आला आहे.गुजरात टायटन्सविरुद्धच्या पराभवानंतर चेन्नईचा यंदाच्या स्पर्धेतील प्रवास संपुष्टात आला. संपूर्ण हंगामात संघाची कामगिरी अपेक्षेपेक्षा खालावलेली दिसली. विशेष म्हणजे, संघात असूनही एम.एस. धोनी मैदानावर प्रभावीपणे सक्रिय नसल्याची चर्चा रंगली होती. त्यामुळे संघाच्या भविष्यासंदर्भात अनेक प्रश्न निर्माण झाले आहेत.

 

 

 

 

एका वृत्तानुसार, सीएसकेमध्ये प्रशिक्षक म्हणून सामील होण्यास इच्छुक असलेल्या एका दावेदाराने स्पष्ट भूमिका घेतली आहे. जोपर्यंत धोनी संघाशी जोडलेले आहेत, तोपर्यंत आपण फ्रँचायझीमध्ये सहभागी होणार नाही, असे त्याने सांगितल्याची माहिती समोर आली आहे. संघातील धोनींचा प्रभाव, निर्णय प्रक्रियेत त्यांचे स्थान आणि त्यांच्या भवितव्याबाबत असलेली अनिश्चितता हे या भूमिकेमागील प्रमुख कारण असल्याचे बोलले जात आहे.दरम्यान, आणखी एका खुलाशानुसार, गेल्या वर्षी एका प्रसिद्ध भारतीय प्रशिक्षकाने सीएसकेमध्ये सामील होण्याची इच्छा व्यक्त केली होती. त्याचे संघातील वरिष्ठ अधिकाऱ्यांशी चांगले संबंधही होते. मात्र, फ्रँचायझीकडूनच त्याला काही काळ थांबण्याचा सल्ला देण्यात आल्याचे वृत्त आहे.

 

 

सध्या न्यूझीलंडचे माजी क्रिकेटपटू स्टीफन फ्लेमिंग हे २००९ पासून चेन्नई सुपर किंग्सचे मुख्य प्रशिक्षक आहेत. मात्र सलग अपयशानंतर आता त्यांच्या भूमिकेवरही प्रश्न उपस्थित होऊ लागले आहेत. आगामी हंगामापूर्वी संघात मोठे बदल होण्याची शक्यता व्यक्त केली जात आहे. सीएसकेसारख्या यशस्वी फ्रँचायझीमध्ये निर्माण झालेली ही परिस्थिती आयपीएल वर्तुळात चर्चेचा विषय ठरली आहे. आता संघ व्यवस्थापन पुढील हंगामासाठी कोणते निर्णय घेते, याकडे सर्व क्रिकेट चाहत्यांचे लक्ष लागले आहे.