प्रहारचा वार बंडाने शमणार!

Prahar Activists Join Thackeray Faction उपमुख्यमंत्री एकनाथ शिंदे यांनी विदर्भातील राजकीय समीकरणे मजबूत करण्यासाठी प्रहारचे अध्यक्ष बच्चू कडु यांच्यावर महत्त्वाची जबाबदारी सोपवल्याची चर्चा रंगली आहे. बच्चू कडू यांच्या शिंदे गटातील प्रवेशानंतर विदर्भात नव्या राजकीय हालचालींना वेग आला असून, यामुळे भाजपची चिंता वाढण्याची शक्यता व्यक्त केली जात आहे. दरम्यान, उद्धव ठाकरे यांनी बच्चू कडूंवर जोरदार टीका करत त्यांच्या निर्णयावर सवाल उपस्थित केले. ‘मातोश्री’ येथे झालेल्या कार्यक्रमात प्रहार जनशक्ती संघटनेतील अनेक कार्यकर्त्यांनी ठाकरे गटात प्रवेश केला. यावेळी उद्धव ठाकरे म्हणाले की, बच्चू कडूंना राजकीय संधी देणे हीच मोठी चूक ठरली. सत्तेच्या आणि पदाच्या मोहापायी त्यांनी वेगळा मार्ग निवडला, मात्र सामान्य कार्यकर्ते अजूनही शिवसेनेसोबत असल्याचा दावा त्यांनी केला.

 

 

 

प्रहार जनशक्ती पक्षात बच्चू कडूंच्या निर्णयामुळे मोठी नाराजी असल्याचे चित्र दिसत आहे. काही पदाधिकारी आणि जिल्हास्तरीय नेत्यांनी उघडपणे असंतोष व्यक्त केला आहे. बच्चू कडूंनी कार्यकर्त्यांचा विचार न करता स्वतःच्या राजकीय फायद्यासाठी निर्णय घेतल्याचा आरोपही करण्यात येत आहे.‘मातोश्री’वर ठाकरे गटात प्रवेश करणाऱ्या कार्यकर्त्यांनी बच्चू कडूंवर गंभीर आरोप केले. आम्हाला विश्वासात न घेता निर्णय घेतला गेला, अशी भावना त्यांनी व्यक्त केली. स्वाभिमानासाठी आम्ही उद्धव ठाकरे यांच्यासोबत आलो असल्याचेही काही कार्यकर्त्यांनी सांगितले. बच्चू कडू यांच्या शिंदे गटातील प्रवेशामुळे विदर्भातील राजकारणात नवीन समीकरणे तयार होण्याची शक्यता आहे. विशेषतः ग्रामीण भागात प्रहार जनशक्तीची असलेली ताकद आणि स्थानिक पातळीवरील प्रभाव लक्षात घेता, आगामी निवडणुकांमध्ये त्याचा परिणाम दिसू शकतो.