रशियाने युक्रेनवर सोडली हायपरसॉनिक मिसाईल

Russia Ukraine war रशिया आणि युक्रेनमधील युद्धाने पुन्हा एकदा तीव्र स्वरूप धारण केले असून, शनिवारी रात्री कीव आणि परिसरात मोठ्या प्रमाणावर क्षेपणास्त्र व ड्रोन हल्ले झाल्याची माहिती समोर आली आहे. युक्रेनचे राष्ट्राध्यक्ष वोलोदिमीर झेलेन्स्की यांनी दावा केला आहे की या हल्ल्यांमध्ये रशियाने हायपरसोनिक क्षमतेच्या ‘ओरेश्निक’ बॅलिस्टिक क्षेपणास्त्राचा वापर केला. मात्र या दाव्याबाबत स्वतंत्रपणे पडताळणी झालेली नाही.

 

 

झेलेन्स्की यांनी रविवारी ‘टेलिग्राम’वरील संदेशात म्हटले की कीव आणि आसपासच्या भागांवर झालेल्या मोठ्या हल्ल्यात अत्याधुनिक आणि अत्यंत विध्वंसक क्षेपणास्त्रांचा वापर करण्यात आला. त्यांच्या म्हणण्यानुसार, बिला त्सेरक्वा शहरावरही या प्रकारच्या क्षेपणास्त्राने हल्ला करण्यात आला असून लक्ष्य नेमके काय होते हे तातडीने स्पष्ट होऊ शकले नाही.दरम्यान, रशियाकडून या हल्ल्यांची अधिकृत पुष्टी करण्यात आली असून, रात्रीच्या कारवाईत विविध प्रकारच्या लांब पल्ल्याच्या क्षेपणास्त्रांचा आणि ड्रोनचा वापर करण्यात आल्याचे सांगितले जात आहे. मात्र ‘ओरेश्निक’ क्षेपणास्त्राच्या वापराबाबत दोन्ही बाजूंकडून परस्परविरोधी दावे समोर येत आहेत.कीवमध्ये झालेल्या या हल्ल्यांमुळे शहरातील अनेक भागांमध्ये भीतीचे वातावरण निर्माण झाले. स्थानिक प्रशासनाच्या प्राथमिक माहितीनुसार किमान 10 नागरिक जखमी झाले असून, शहरातील मध्यवर्ती भागातील सरकारी कार्यालये, निवासी इमारती तसेच शाळेजवळील परिसराला मोठे नुकसान झाले आहे. रात्रीभर हवाई हल्ल्यांचे सायरन वाजत राहिले आणि अनेक ठिकाणी स्फोटांचे आवाज ऐकू आले.

कीवचे महापौर विटाली क्लिट्स्को Russia Ukraine war  यांनी सांगितले की शेवचेंको जिल्ह्यातील एका शाळेच्या इमारतीला धक्का बसला असून, काही नागरिकांनी तेथे आश्रय घेतला होता. तसेच सुपरमार्केट, गोदामे आणि इतर नागरी पायाभूत सुविधांनाही नुकसान झाल्याची माहिती मिळत आहे. शहर प्रशासनाने दिलेल्या माहितीनुसार किमान नऊ जिल्ह्यांमध्ये निवासी इमारती आणि इतर मालमत्तांचे नुकसान नोंदवले गेले आहे.कीव क्षेत्रातील प्रशासन प्रमुख तिमूर तकाचेन्को यांनी सांगितले की अनेक समुदायांमध्ये घरांचे आणि सार्वजनिक इमारतींचे मोठ्या प्रमाणावर नुकसान झाले आहे. प्राथमिक अंदाजानुसार, हल्ल्यांचा प्रभाव व्यापक असून बचाव व मदतकार्य सुरू आहे.या घडामोडींमध्ये आणखी एक महत्त्वाचा मुद्दा म्हणजे ‘ओरेश्निक’ क्षेपणास्त्राचा कथित वापर. युक्रेनच्या अधिकाऱ्यांच्या म्हणण्यानुसार, हे हायपरसोनिक क्षेपणास्त्र अण्वस्त्र किंवा पारंपरिक वॉरहेड वाहून नेण्यास सक्षम असून त्याचा वापर तिसऱ्यांदा करण्यात आल्याचा दावा केला जात आहे. मात्र या क्षेपणास्त्राच्या वापराबाबत स्वतंत्र स्रोतांकडून पुष्टी मिळालेली नाही.युक्रेनने याआधीच अमेरिकेसह पश्चिमी देशांकडून मिळालेल्या गुप्तचर माहितीनुसार अशा हल्ल्यांची शक्यता व्यक्त केली होती. हवाई दलानेही हायपरसोनिक क्षेपणास्त्र डागले जाण्याची शक्यता वर्तवली होती. यापूर्वी नोव्हेंबर 2024 मध्ये निप्रो शहरावर आणि नंतर जानेवारीमध्ये पश्चिम ल्वीव्ह भागात अशा प्रकारच्या क्षेपणास्त्रांचा वापर झाल्याचे दावे करण्यात आले होते.

 

 

सध्याच्या हल्ल्यांमुळे कीवमध्ये तणावाचे वातावरण असून पुढील काही तासांमध्ये आणखी हवाई हल्ल्यांचा धोका असल्याची शक्यता युक्रेनच्या सुरक्षा यंत्रणांनी व्यक्त केली आहे. बचाव पथके आणि आपत्कालीन सेवा नुकसान झालेल्या भागांमध्ये मदतकार्य करत आहेत, तर नागरिकांना सुरक्षित स्थळी राहण्याचे आवाहन करण्यात आले आहे.