गुन्हेगारीत देशात पाचवे स्थान...पोलिसांचा धाक संपला

supriya sule पुणे शहरात वाढत्या गुन्हेगारीच्या घटनांमुळे कायदा आणि सुव्यवस्थेचा प्रश्न गंभीर बनला असून, भरदिवसा होणाऱ्या हत्या आणि वाढत्या दहशतीमुळे नागरिकांमध्ये भीतीचे वातावरण निर्माण झाले आहे. पुणे शहर देशातील गुन्हेगारीत पाचव्या क्रमांकावर पोहोचले असून, गुन्हेगारांवर पोलिसांचा धाक राहिलेला नाही, अशी तीव्र टीका खासदार सुप्रिया सुळे यांनी केली आहे.

 

 

पुण्यात अलीकडच्या काळात भरदिवसा हत्या, कोयता गँगचा उच्छाद, खंडणी, अमली पदार्थांची तस्करी आणि महिलांवरील अत्याचारांच्या घटनांमध्ये मोठी वाढ झाली आहे. या पार्श्वभूमीवर सुप्रिया सुळे यांनी राज्य सरकार आणि पोलिस प्रशासनावर निशाणा साधला. शहरातील कायदा-सुव्यवस्था पूर्णपणे ढासळली असून नागरिकांना सुरक्षिततेची हमी उरलेली नाही, असे त्यांनी म्हटले.सुळे यांनी सांगितले की, पुणे हे एकेकाळी शिक्षणाचे आणि संस्कृतीचे शहर म्हणून ओळखले जात होते. मात्र आता शहराची ओळख गुन्हेगारीमुळे होत असल्याचे चित्र निर्माण झाले आहे. दिवसाढवळ्या घडणाऱ्या हत्या आणि टोळ्यांच्या वाढत्या हालचालींमुळे सामान्य नागरिक भयभीत झाले आहेत. गुन्हेगारांना कोणतीही भीती राहिलेली नसून पोलिस यंत्रणा प्रभावीपणे काम करताना दिसत नाही, अशी टीकाही त्यांनी केली.

 

 

राज्यातील सत्ताधाऱ्यांनी केवळ घोषणांपुरते मर्यादित न राहता प्रत्यक्षात कठोर पावले उचलण्याची गरज असल्याचे त्यांनी नमूद केले. गुन्हेगारी रोखण्यासाठी पोलिस दलाला अधिक सक्षम करणे, गस्त वाढवणे आणि संघटित गुन्हेगारीविरोधात कठोर कारवाई करणे आवश्यक असल्याचे त्यांनी सांगितले.दरम्यान, पुणे शहरात गेल्या काही महिन्यांत अनेक धक्कादायक गुन्हे समोर आले आहेत. कोयता गँगच्या दहशतीपासून ते भररस्त्यात झालेल्या हत्यांपर्यंत अनेक घटनांनी शहर हादरले आहे. या घटनांमुळे नागरिकांमध्ये असुरक्षिततेची भावना वाढत असून, विरोधकांकडून सरकारवर सातत्याने टीका केली जात आहे.