हिंदूविरोधी वक्तव्य दीदींना भोवले; एफआयआर दाखल

Mamata FIR Filed पश्चिम बंगालच्या माजी मुख्यमंत्री ममता बॅनर्जी यांच्या विरोधात सिलीगुडी सायबर पोलीस ठाण्यात एफआयआर दाखल करण्यात आला आहे. निवडणुकीपूर्वी तसेच २०२५ मध्ये ईदच्या कार्यक्रमादरम्यान हिंदूंविरोधात आक्षेपार्ह आणि अपमानजनक वक्तव्य केल्याचा आरोप त्यांच्यावर करण्यात आला आहे. ही तक्रार भाजप कार्यकर्त्या आणि वकील रिंकी चॅटर्जी यांनी दाखल केली आहे. त्यांनी असा दावा केला आहे की, यापूर्वीही त्यांनी याच प्रकरणी तक्रार देण्याचा प्रयत्न केला होता, मात्र त्याकडे दुर्लक्ष करण्यात आले. दरम्यान, या घटनेनंतर राजकीय वातावरण तापले असून विविध स्तरांवर प्रतिक्रिया उमटत आहेत. सोशल मीडियावरही या प्रकरणाची जोरदार चर्चा सुरू आहे.

 

 

 

याच पार्श्वभूमीवर, सोमवारी अभिषेक बॅनर्जी यांच्या शांतीनिकेतन येथील निवासस्थानी पोलिसांनी भेट दिल्याची माहिती समोर आली आहे. या कारवाईदरम्यान सुरक्षा तपासणीशी संबंधित एक एलईडी टेलिव्हिजन मॉनिटर जप्त करण्यात आला असल्याचेही सांगितले जात आहे. या भेटीनंतर परिसरात काही काळ गोंधळाचे वातावरण निर्माण झाले होते. पोलिस पथकात गणवेशधारी तसेच साध्या वेशातील कर्मचारी होते. या कारवाईचे अनेक व्हिडिओ सोशल मीडियावर व्हायरल झाल्याने विविध तर्कवितर्कांना उधाण आले आहे. सध्या या संपूर्ण प्रकरणाचा पुढील तपास सिलीगुडी सायबर पोलीस करत असून, राजकीय वर्तुळात या मुद्द्यावरून आरोप-प्रत्यारोप तीव्र झाले आहेत.