मेकेदातू पाणीप्रश्नावर मुख्यमंत्री विजय यांची पंतप्रधान मोदींकडे धाव

mekedatu water issue तामिळनाडूचे मुख्यमंत्री सी. जोसेफ विजय यांनी मुख्यमंत्रीपदाची सूत्रे हाती घेतल्यानंतर प्रथमच दिल्ली दौरा करत पंतप्रधान नरेंद्र मोदी यांची भेट घेतली. या भेटीत त्यांनी कर्नाटक आणि तामिळनाडू यांच्यात दीर्घकाळ प्रलंबित असलेल्या मेकेदातू धरण प्रकल्पाच्या वादावर केंद्र सरकारने तत्काळ तोडगा काढावा, अशी मागणी केली.

 

 

 

दिल्लीतील या महत्त्वपूर्ण बैठकीत मुख्यमंत्री विजय यांनी कावेरी नदीच्या पाणीवाटपाच्या मुद्द्यावर तामिळनाडूची भूमिका स्पष्टपणे मांडली. मेकेदातू येथे प्रस्तावित धरण उभारण्याच्या कर्नाटक सरकारच्या योजनेमुळे तामिळनाडूच्या हक्काच्या पाण्यावर परिणाम होऊ शकतो, अशी चिंता त्यांनी व्यक्त केली. त्यामुळे या विषयात केंद्राने हस्तक्षेप करून दोन्ही राज्यांमध्ये समन्वय साधावा, असे त्यांनी पंतप्रधानांकडे सांगितले.

मेकेदातू प्रकल्प हा कर्नाटकातील रामनगर जिल्ह्यात कावेरी नदीवर प्रस्तावित आहे. बंगळूर आणि आसपासच्या भागांना पिण्याच्या पाण्याचा पुरवठा करणे, तसेच जलसाठा आणि वीज निर्मिती वाढवणे हा या प्रकल्पाचा उद्देश असल्याचे कर्नाटक सरकारचे म्हणणे आहे. मात्र, तामिळनाडूने या प्रकल्पाला सुरुवातीपासूनच विरोध दर्शवला आहे. कावेरी पाणीवाटपाबाबत आधीच करार आणि न्यायालयीन आदेश अस्तित्वात असल्याने, नवीन धरणामुळे राज्यातील सिंचन आणि शेती व्यवस्थेवर गंभीर परिणाम होऊ शकतो, असा तामिळनाडू सरकारचा दावा आहे.

पंतप्रधान मोदींसोबतच्या चर्चेनंतर मुख्यमंत्री विजय यांनी दिल्लीतील तामिळनाडू हाऊसलाही भेट दिली. तेथे त्यांचे औपचारिक स्वागत करण्यात आले.mekedatu water issue यावेळी त्यांनी अधिकाऱ्यांशी संवाद साधून विविध प्रशासकीय बाबींचा आढावा घेतला. दरम्यान, दिल्ली दौऱ्यात मुख्यमंत्री विजय हे उपराष्ट्रपती सी. पी. राधाकृष्णन, केंद्रीय गृहमंत्री अमित शाह आणि अर्थमंत्री निर्मला सीतारामन यांचीही भेट घेण्याची शक्यता असल्याची माहिती सूत्रांनी दिली आहे. तसेच काँग्रेस नेत्या सोनिया गांधी, राहुल गांधी आणि मल्लिकार्जुन खर्गे यांच्यासोबतही त्यांच्या चर्चेची शक्यता व्यक्त केली जात आहे.