खळबळ! दीपाली सय्यद यांना धमकी
Total Views |
मुंबई
Deepali Sayyad मराठी चित्रपट अभिनेत्री आणि शिवसेना नेत्या दीपाली सय्यद सध्या चर्चेच्या केंद्रस्थानी आल्या आहेत. नाशिकमधील भोंदूबाबा अशोक खरात याच्यावर आधारित कथानक असलेल्या नव्या चित्रपटात त्या महत्त्वाची भूमिका साकारत आहेत. मात्र, या प्रकल्पात काम करू नये यासाठी त्यांच्यावर दबाव टाकण्यात आल्याचा आणि धमकी देण्यात आल्याचा गंभीर प्रकार समोर आला आहे. विशेष म्हणजे, ही धमकी एका महिला नेत्याकडून मिळाल्याची माहिती पुढे येत असल्याने राजकीय वर्तुळात मोठी खळबळ उडाली आहे.
मिळालेल्या प्राथमिक माहितीनुसार, संबंधित चित्रपटाच्या विषयावरून काही घटकांनी दीपाली सय्यद यांच्यावर फोन किंवा संदेशाद्वारे दबाव टाकत चित्रपटातून बाहेर पडण्याची मागणी केली आहे. तसेच, त्यांनी या प्रकल्पात सहभाग कायम ठेवल्यास त्यांच्या राजकीय कारकीर्दीवर परिणाम घडवण्याचा इशारा दिल्याचेही सांगितले जात आहे. या प्रकारामुळे मनोरंजन आणि राजकीय क्षेत्रात तणावाचे वातावरण निर्माण झाले आहे.
दरम्यान, या संपूर्ण प्रकरणावर अद्याप दीपाली सय्यद यांची अधिकृत तक्रार पोलिसांकडे दाखल झाल्याची माहिती समोर आलेली नाही. तथापि, अशा प्रकारच्या धमक्यांमुळे कलाकारांच्या स्वातंत्र्यावर प्रश्नचिन्ह निर्माण होत असल्याची चर्चा सुरू झाली आहे. संबंधित प्रकरणाची गंभीर दखल घेतली जाईल का, याकडे सर्वांचे लक्ष लागले आहे.दीपाली सय्यद यांनी यापूर्वी या चित्रपटाबाबत स्पष्ट भूमिका मांडली होती. त्या म्हणाल्या होत्या की, भोंदूबाबा अशोक खरात या विषयावरील चित्रपटाची त्यांना आधी कल्पना नव्हती. बिग बॉसच्या घरातून बाहेर आल्यानंतर याबाबत माहिती मिळाली. हा चित्रपट त्या स्वतः निर्मित करत नसून केवळ कलाकार म्हणून त्यात भूमिका साकारत आहेत, असे त्यांनी स्पष्ट केले होते. तसेच, लवकरच त्या प्रेक्षकांसमोर येणार असल्याचेही त्यांनी सांगितले होते.
या पार्श्वभूमीवर धमकीच्या प्रकारामुळे चित्रपटाच्या निर्मिती प्रक्रियेवर आणि संबंधित कलाकारांवर दबाव निर्माण झाल्याचे दिसून येत आहे. पुढील घडामोडींकडे आता संपूर्ण मराठी मनोरंजनसृष्टी आणि राजकीय वर्तुळाचे लक्ष लागले आहे.