ट्विशा शर्मा मृत्यू प्रकरणात गिरिबाला सिंग सीबीआयच्या ताब्यात

giribala singh in cbi custody ट्विशा शर्मा मृत्यू प्रकरणात तपास यंत्रणांनी मोठी कारवाई करत ट्विशाची सासू गिरिबाला सिंग यांना अटक केली आहे. मध्य प्रदेशातील भोपाळ येथे सीबीआयने सुमारे सहा तासांहून अधिक काळ चौकशी केल्यानंतर ही कारवाई करण्यात आली. अटकेनंतर त्यांना न्यायालयात हजर करण्याची प्रक्रिया सुरू करण्यात आली आहे.

 

 

 

 

या प्रकरणात बुधवारी उशिरा जबलपूर उच्च न्यायालयाने गिरिबाला सिंग यांना यापूर्वी मंजूर करण्यात आलेला अटकपूर्व जामीन रद्द केला होता. न्यायालयाच्या या निर्णयानंतर त्यांच्या अटकेची शक्यता वाढली होती. त्यानंतर गुरुवारी सकाळी सीबीआयचे विशेष पथक भोपाळमधील कटारा हिल्स परिसरातील त्यांच्या निवासस्थानी पोहोचले. अधिकाऱ्यांनी त्यांना नोटीस बजावत चौकशीसाठी ताब्यात घेतले.

ट्विशा शर्मा मृत्यू प्रकरणाची चौकशी सुरुवातीपासूनच चर्चेत राहिली आहे. सत्र न्यायालयाने १५ मे रोजी गिरिबाला सिंग यांना अटकपूर्व जामीन मंजूर केला होता. मात्र, ट्विशाच्या कुटुंबीयांनी या निर्णयाला उच्च न्यायालयात आव्हान दिले. प्रकरणातील गंभीर आरोप आणि उपलब्ध पुरावे लक्षात घेता, उच्च न्यायालयाने कनिष्ठ न्यायालयाचा निर्णय रद्द करत गिरिबाला सिंग यांना दिलेला दिलासा अयोग्य असल्याचे स्पष्ट केले.

उच्च न्यायालयाच्या आदेशानंतर सीबीआयने तपासाला वेग दिला. बुधवारी संध्याकाळी तपास अधिकाऱ्यांनी ट्विशाच्या मृत्यूशी संबंधित घटनास्थळाची पुनर्रचना केली. ज्या ठिकाणी ट्विशाने कथितरित्या गळफास घेतल्याचे सांगितले जात होते, त्या ठिकाणी अधिकारी पोहोचले आणि संपूर्ण परिस्थितीचा बारकाईने आढावा घेतला.

तपासादरम्यान ट्विशाचा पती समर्थ आणि गिरिबाला सिंग यांची समोरासमोर चौकशीही करण्यात आली. समर्थ याला यापूर्वीच अटक करण्यात आली असून तो सध्या पोलीस कोठडीत आहे.giribala singh in cbi custody आता दोघांकडून एकत्रित चौकशी करून मृत्यूमागील नेमकी कारणे आणि घटनाक्रम उघड करण्याचा सीबीआयचा प्रयत्न आहे. दरम्यान, या प्रकरणामुळे भोपाळसह संपूर्ण मध्य प्रदेशात मोठी चर्चा रंगली असून, तपास यंत्रणांकडून पुढील काही दिवसांत आणखी महत्त्वाच्या खुलाशांची शक्यता व्यक्त केली जात आहे.