रणवीर सिंहला मिका सिंहकडून समर्थन

Mika Singh बॉलिवूड अभिनेता रणवीर सिंह सध्या केवळ आपल्या चित्रपटांमुळेच नव्हे, तर इंडस्ट्रीतील एका वादामुळे चर्चेच्या केंद्रस्थानी आला आहे. ‘डॉन ३’ या बहुचर्चित चित्रपटातून शूटिंगच्या काही आठवडे आधीच त्याने माघार घेतल्याच्या चर्चेनंतर या प्रकरणाला नवे वळण मिळाले असून, त्यावर फिल्म इंडस्ट्रीतील विविध स्तरांवर प्रतिक्रिया उमटत आहेत. या पार्श्वभूमीवर फेडरेशन ऑफ वेस्टर्न इंडिया सिने एम्प्लॉइज (FWICE) कडून त्याच्याविरोधात असहकाराचे निर्देश जारी करण्यात आल्याने वातावरण अधिकच तापले आहे.

 

 

दिग्दर्शक फरहान अख्तर यांच्या ‘डॉन ३’साठी रणवीर सिंहची मुख्य भूमिकेसाठी घोषणा 2023 मध्ये करण्यात आली होती. मात्र प्रत्यक्ष शूटिंग सुरू होण्याच्या काही आठवडे आधीच काही मतभेदांमुळे त्याने या प्रकल्पातून माघार घेतल्याचे सांगितले जाते. या अचानक निर्णयामुळे निर्मिती संस्थेला मोठ्या आर्थिक नुकसानाला सामोरे जावे लागले असून, अंदाजे 45 कोटी रुपयांचा फटका बसल्याची माहिती समोर आली आहे. या पार्श्वभूमीवर संबंधित निर्मिती संस्थेने FWICE कडे तक्रार दाखल केली होती.

तक्रारीनंतर FWICE कडून रणवीर सिंहला आपली बाजू मांडण्यासाठी तीन वेळा नोटीस पाठवण्यात आल्याचे सांगितले जाते. मात्र त्यावर कोणतीही ठोस प्रतिक्रिया न मिळाल्याने अखेर फेडरेशनने त्याच्याविरोधात इंडस्ट्रीतील असहकाराचे निर्देश जारी केले आहेत. या निर्णयामुळे काही काळासाठी रणवीर सिंहसोबत सहकार्य न करण्याबाबतचे संकेत इंडस्ट्रीतील काही घटकांना देण्यात आले असल्याची चर्चा आहे.

या वादाच्या Mika Singh पार्श्वभूमीवर प्रसिद्ध गायक मिका सिंह रणवीरच्या समर्थनार्थ पुढे आला आहे. एका पापाराझी अकाउंटशी संवाद साधताना त्याने रणवीर सिंह हा अत्यंत नम्र आणि चांगल्या स्वभावाचा व्यक्ती असल्याचे म्हटले. तसेच FWICEशी वैयक्तिक पातळीवर चर्चा करून हा मुद्दा सोडवण्याचा प्रयत्न करणार असल्याचेही त्याने संकेत दिले आहेत.या घडामोडींमुळे बॉलिवूडमध्ये या प्रकरणावर विविध प्रतिक्रिया उमटत असून, ‘डॉन ३’च्या भविष्यासह रणवीर सिंहच्या पुढील प्रकल्पांवरही याचा काही परिणाम होतो का, याकडे आता संपूर्ण इंडस्ट्रीचे लक्ष लागले आहे.