ट्विशा शर्मा हत्या प्रकरणात पती-सासू सीबीआय कोठडीत

Husband and Mother-in-Law in CBI Custody भोपाळमधील चर्चित ट्विशा शर्मा हत्या प्रकरणात तपासाला मोठी गती मिळाली आहे. या प्रकरणात ट्विशाचा पती समर्थ आणि सासू गिरीबाला सिंग यांना न्यायालयाने सीबीआयच्या पाच दिवसांच्या पोलीस कोठडीची मंजुरी दिली आहे. दीर्घ चौकशीनंतर सीबीआयने गिरीबाला सिंग यांना अटक केली होती. यापूर्वी समर्थ सीबीआयच्या सात दिवसांच्या कोठडीत होता. आता न्यायालयाच्या आदेशानुसार दोघेही २ जूनपर्यंत सीबीआयच्या ताब्यात राहणार आहेत. शुक्रवारी सीबीआयने समर्थ आणि गिरीबाला सिंग यांना भोपाळ जिल्हा न्यायालयात हजर केले. दोघांना वेगवेगळ्या वाहनांतून न्यायालयात आणण्यात आले होते. प्रथम वर्ग न्यायदंडाधिकारी शोभना भलावे यांच्या न्यायालयात सुनावणी पार पडली.

 

न्यायालयात दोघांनाही एकाच कठड्यात उभे करण्यात आले.दरम्यान, या प्रकरणाच्या तपासासाठी सीबीआयने अत्याधुनिक तांत्रिक पद्धतींचा वापर सुरू केला आहे. ट्विशाच्या मृत्यूपूर्वीच्या शेवटच्या क्षणांची सखोल माहिती मिळवण्यासाठी ‘टनल व्ह्यू इन्व्हेस्टिगेशन’ या विशेष तंत्राचा वापर केला जात आहे. या पद्धतीत ट्विशाच्या प्रत्येक हालचाली, संवाद आणि डिजिटल अ‍ॅक्टिव्हिटीचा मिनिटागणिक अभ्यास केला जात आहे. तपास अधिकाऱ्यांनी घरातील सीसीटीव्ही फुटेज, मोबाईल डेटा, कॉल डिटेल्स, वाय-फाय लॉग्स आणि फॉरेन्सिक मॅपिंगच्या आधारे संपूर्ण घराचा आभासी नकाशा तयार करण्यास सुरुवात केली आहे.

 

 

 

या डिजिटल पुनर्रचनेच्या मदतीने ट्विशाच्या शेवटच्या हालचालींचा मागोवा घेतला जाणार आहे. कोण कोणत्या खोलीत आले-गेले, कोणत्या वेळेला हालचाल झाली आणि घटनेपूर्वी नेमके काय घडले, याचा तपशील शोधण्याचा प्रयत्न सुरू आहे. सूत्रांच्या माहितीनुसार, तपास यंत्रणा विविध डिजिटल पुरावे एकत्र करून घटनाक्रमातील विसंगती शोधण्याचा प्रयत्न करत आहे. टाइमस्टॅम्प, फोन लोकेशन, इंटरनेट वापर आणि हालचालींच्या आधारे संपूर्ण घटनाक्रमाची साखळी तयार केली जात आहे.तसेच घटनेनंतर कोणताही डिजिटल पुरावा हटवला गेला किंवा छेडछाड करण्यात आली का, याचाही तपास सीबीआय करत आहे. ट्विशाच्या मृत्यूमागे कोणता कट होता का किंवा घटनास्थळ बदलण्याचा प्रयत्न झाला का, याचा उलगडा करण्यासाठी तपास अधिक तीव्र करण्यात आला आहे.