व्हिटॅमिन D3, कॅल्शियमसह ३० औषधे स्वस्त!

30 Medicines Become Cheaper सामान्य नागरिकांना अत्यावश्यक औषधे योग्य आणि परवडणाऱ्या दरात मिळावीत यासाठी राष्ट्रीय औषध किंमत प्राधिकरणाने महत्त्वाचा निर्णय घेतला आहे. प्राधिकरणाने एकूण ३० औषधांच्या कमाल किरकोळ किंमती निश्चित केल्या असून त्या तात्काळ लागू करण्यात आल्या आहेत. या निर्णयामुळे औषध बाजारात पारदर्शकता वाढण्यासोबतच रुग्णांच्या खिशावरील भार कमी होण्याची अपेक्षा व्यक्त केली जात आहे.२७ मे २०२६ रोजी जारी करण्यात आलेल्या आदेशात व्हिटॅमिन डी३, कॅल्शियम, मिथाइलकोबालामिन, एल-मिथाइलफोलेट कॅल्शियम, पायरीडॉक्सल-५ फॉस्फेट यांसारख्या महत्त्वाच्या जीवनसत्व आणि आरोग्यपूरक औषधांचा समावेश आहे. ही औषधे हाडांचे आरोग्य, व्हिटॅमिनची कमतरता आणि विविध न्यूरोलॉजिकल समस्यांवरील उपचारांमध्ये मोठ्या प्रमाणावर वापरली जातात.

 

 

 

 

याशिवाय बिलास्टिन-मॉन्टेलुकास्ट टॅब्लेट, बिसोप्रोलोल फ्युमरेट, ॲटोरवास्टॅटिन-फेनोफायब्रेट आणि ॲम्लोडिपिन यांसारख्या औषधांचाही या यादीत समावेश आहे. प्रत्येक औषधाची प्रति युनिट नवीन किंमत निश्चित करण्यात आली असून उत्पादक आणि विक्री करणाऱ्या कंपन्यांना या दरांचे काटेकोर पालन करणे बंधनकारक करण्यात आले आहे.विशेष म्हणजे व्हिटॅमिन डी३, कॅल्शियम, मिथाइलकोबालामिन आणि संबंधित घटक असलेल्या गोळ्यांची किंमत प्रति टॅब्लेट सुमारे ₹१९.७८ निश्चित करण्यात आली आहे, तर काही कोलेस्ट्रॉल नियंत्रण औषधांची किंमत ₹१८.४६ प्रति गोळी इतकी ठेवण्यात आली आहे. एनपीपीएच्या मते, या निर्णयाचा मुख्य उद्देश अत्यावश्यक औषधे सर्वसामान्यांना वाजवी दरात उपलब्ध करून देणे आणि बाजारातील अनियंत्रित किंमतींवर नियंत्रण ठेवणे हा आहे. नवीन दर लागू झाल्याने आरोग्यसेवा खर्चात काही प्रमाणात दिलासा मिळण्याची शक्यता आहे.