पडळकर आणि रोहित पवारांचे कार्यकर्ते तुटून पडले

Gopichand Padalkar राजमाता अहिल्याबाई होळकर यांच्या ३०१ व्या जयंतीनिमित्त देशभरात उत्साहाचे वातावरण असताना, अहिल्यानगरच्या चौंडी येथे आयोजित जयंती कार्यक्रमात दोन राजकीय गटांत वादग्रस्त घटना घडली. भाजपचे आमदार गोपिचंद पडळकर यांचे कार्यकर्ते आणि राष्ट्रवादी काँग्रेसचे आमदार रोहित पवार यांच्या कार्यकर्त्यांमध्ये जोरदार धरपकड झाली आणि दोन्ही गटांमध्ये तणाव निर्माण झाला.

 

 

जयंतीच्या कार्यक्रमात गोपिचंद पडळकर यांचे गाणे व नृत्य कार्यक्रम ठिकाणी व्हायरल झाले. या पार्श्वभूमीवर रोहित पवार यांनी ट्विट करून संताप व्यक्त केला. त्यांनी म्हटले की, “लोककल्याणकारी राज्याचा आदर्श घालून देणाऱ्या पुण्यश्लोक अहिल्यादेवी होळकर यांच्या जयंतीनिमित्त चोंडी येथील त्यांच्या जन्मस्थळी अभिवादन करण्यासाठी गेलो असता विरोधकांचं अत्यंत किळसवाणं वर्तन बघायला मिळालं. पुण्यश्लोक अहिल्यादेवींच्या आदर्शाऐवजी स्वतःचं उदोउदो करणे आणि ‘रामभाऊ तुमचं काम एक नंबर’ अशी स्वतःची आरती गाणे ऐकावे लागले, हे संतापजनक आहे.”घटनेनंतर दोन्ही गटांचे कार्यकर्ते एकमेकांच्या विरोधात तिथेच भिडले, काही ठिकाणी धक्काबुक्की झाली. रोहित पवार यांनी या परिस्थितीवर प्रतिक्रिया व्यक्त करत म्हटले की, पुण्यश्लोक अहिल्यादेवींच्या स्मारकाजवळ असे वर्तन योग्य नाही.

दुसरीकडे, गोपिचंद पडळकर यांनीही प्रतिक्रिया देताना सांगितले की, “अहिल्यादेवींना अभिवादन करण्यासाठी स्वच्छ मनाने येणं आवश्यक आहे. दंगल घडवण्याचा हेतू ठेवून येणं योग्य नाही. स्टंटबाजी केली तर आम्ही बघत बसणार नाही.”स्थानिक प्रशासनाने घटनास्थळावर पोलीस पथक तैनात करून परिस्थिती नियंत्रित करण्याचा प्रयत्न केला आहे. या घटनेमुळे जयंती कार्यक्रमातील शांतता काही काळ बिघडली असली तरी, आयोजकांनी कार्यक्रम सुरू ठेवण्याचे प्रयत्न केले.राजकीय वर्तुळात या घटनेवरून चर्चेची उधाण झाली असून, आगामी काळात या तणावग्रस्त परिस्थितीवर प्रशासन आणि राजकीय पक्षांमध्ये चर्चा होण्याची शक्यता आहे.