तामिळनाडूत मोठा उलटफेर, मुख्यमंत्रीसह ३१ मंत्री पिछाडीवर

31 ministers in Tamil Nadu तामिळनाडू विधानसभा निवडणुकीच्या मतमोजणीत समोर येत असलेले प्रारंभीचे कल राज्याच्या राजकारणात मोठा बदल घडवण्याचे संकेत देत आहेत. अनेक दशकांपासून द्रविड मुन्नेत्र कळघम आणि अण्णाद्रमुक या दोन प्रमुख पक्षांभोवती फिरणारे राजकारण यावेळी वेगळे वळण घेताना दिसत आहे. अभिनेते विजय यांच्या नेतृत्वाखालील तमिळगा वेत्री कळघम या नव्या पक्षाने जोरदार कामगिरी करत सर्वांचे लक्ष वेधून घेतले आहे. सुरुवातीच्या आकडेवारीनुसार सत्ताधारी पक्षासाठी परिस्थिती आव्हानात्मक ठरताना दिसत आहे. मुख्यमंत्री एम. के. स्टॅलिन यांच्यासह मंत्रिमंडळातील बहुतांश मंत्री त्यांच्या मतदारसंघात मागे पडल्याचे चित्र आहे. मंत्रिमंडळातील बहुतांश सदस्य पिछाडीवर असल्याने सत्ताधारी पक्षासाठी ही मोठी धक्का मानली जात आहे.

 

 

 

 

दुसरीकडे, विजय यांच्या पक्षाने अनेक मतदारसंघांमध्ये आघाडी घेत बहुमताच्या दिशेने झेप घेतली आहे. पहिल्यांदाच निवडणुकीच्या मैदानात उतरलेल्या या पक्षाने मोठ्या प्रमाणात जनतेचा पाठिंबा मिळवला असल्याचे स्पष्ट दिसत आहे. राज्यातील सत्तेचा ताबा स्वबळावर मिळवण्याची शक्यता व्यक्त केली जात असून हा निकाल तामिळनाडूच्या राजकारणात ऐतिहासिक ठरू शकतो.अण्णाद्रमुक आणि त्यांच्या सहयोगी पक्षांना अपेक्षित यश मिळताना दिसत नसल्याचे चित्र आहे, तर द्रविड मुन्नेत्र कळघम आणि त्यांच्या सहयोगी पक्षांनाही मोठा फटका बसण्याची शक्यता वर्तवली जात आहे. एकूण २३४ जागांसाठी झालेल्या या निवडणुकीत बहुमतासाठी ११८ जागांची गरज असून सध्याच्या कलांनुसार विजय यांच्या पक्षाची घोडदौड या टप्प्यापर्यंत पोहोचताना दिसत आहे. दुपारपर्यंत अंतिम निकाल स्पष्ट होण्याची शक्यता असून या निवडणुकीतून राज्यातील सत्तासमीकरणे पूर्णपणे बदलण्याची चिन्हे दिसत आहेत.