बाबर आझम 'गोल्डन डक', तरीही पटकावली 'ट्रॉफी' VIDEO

PSL 2026 : हैदराबाद किंग्समेनच्या पराभवामुळे पाकिस्तान सुपर लीग (पीएसएल) २०२६ चा विजेता निश्चित झाला आहे. बाबर आझमच्या नेतृत्वाखालील पेशावर झल्मीने अंतिम सामना जिंकून पीएसएल २०२६ ची चमकदार ट्रॉफी पटकावली. पेशावरच्या विजेतेपदाचा नायक ऑस्ट्रेलियाचा शक्तिशाली अष्टपैलू खेळाडू ॲरॉन हार्डी होता, ज्याने फलंदाजी आणि गोलंदाजी दोन्हीमध्ये उत्कृष्ट कामगिरी केली. लक्ष्याचा पाठलाग करताना, हार्डीने एक शानदार अर्धशतक झळकावले आणि तो नाबाद राहिला.

 

 

 

 

 

 

पीएसएल २०२६ च्या अंतिम सामन्यात, एका मोठ्या विक्रमाच्या उंबरठ्यावर असलेला बाबर आझम आपले खातेही न उघडता पॅव्हेलियनमध्ये परतल्याने क्रिकेट चाहत्यांना मोठा धक्का बसला. एका ऐतिहासिक कामगिरीची अपेक्षा असताना, त्याचे गोल्डन डकवर बाद होणे हा सामन्यातील सर्वात आश्चर्यकारक क्षण ठरला.

 

पाकिस्तान सुपर लीग २०२६ च्या अंतिम सामन्यात हैदराबाद किंग्समेनविरुद्ध पेशावर झल्मीचा कर्णधार बाबर आझम पहिल्याच चेंडूवर बाद झाला. लाहोरमधील गद्दाफी स्टेडियमवर खेळल्या गेलेल्या या सामन्यात, बाबर आझमने मोहम्मद अलीच्या ऑफ स्टंपच्या बाहेर जाणाऱ्या चेंडूवर कट शॉट खेळण्याचा प्रयत्न केला, पण तो झेलबाद झाला. त्यामुळे बाबर आझमने एक मोठा विक्रम करण्याची संधी गमावली. जर त्याने या सामन्यात फक्त एक धाव केली असती, तर त्याने एकाच हंगामात सर्वाधिक धावा करण्याचा विक्रम प्रस्थापित केला असता. मात्र, पहिल्याच षटकात बाद झाल्यामुळे त्याची ही संधी हुकली.

 

बाबर लवकर बाद झाल्यानंतर, पेशावर झल्मीची सुरुवातही खराब झाली आणि पहिल्याच षटकात सात धावांत दोन गडी बाद झाले. मोहम्मद अलीने उत्कृष्ट गोलंदाजी करत सुरुवातीलाच मोठे धक्के दिले. ४० धावांच्या आत पेशावरचे चार फलंदाज बाद झाले. त्यानंतर ॲरन हार्डीने अब्दुल समदसोबत एक भक्कम भागीदारी रचून विजय निश्चित केला. पेशावर झल्मीने १६व्या षटकाच्या दुसऱ्या चेंडूवर पाच गडी गमावून १३० धावांचे लक्ष्य पूर्ण केले.

 

 

 

 

यापूर्वी, हैदराबाद किंग्समेनच्या फलंदाजांनी बरीच निराशा केली होती. प्रथम फलंदाजी करताना, संघ १८ षटकांत केवळ १२९ धावांवर सर्वबाद झाला. एके वेळी धावसंख्या ३ गडी बाद ७१ होती, पण त्यानंतर संघाच्या विकेट्स सतत पडत राहिल्या. हैदराबादकडून सॅम अयुबने सर्वाधिक ५४ धावा केल्या आणि डाव सावरण्याचा प्रयत्न केला. दरम्यान, कर्णधार मार्नस लॅबुशेनने २० धावांची जलद खेळी केली. पेशावर झल्मीकडून ॲरॉन हार्डीने ४ बळी घेऊन आपल्या गोलंदाजीचे कौशल्य दाखवले, तर नाहिद राणानेही महत्त्वपूर्ण बळी घेऊन विरोधी संघाचे कंबरडे मोडले. एकूणच, अंतिम सामन्यात बाबर आझमचे शून्यावर बाद होणे (गोल्डन डक) चर्चेचा विषय बनले.