आसाममध्ये सुरुवातीलाच भगवी लाट!

Saffron wave in Assam आसाम विधानसभा निवडणुकीच्या मतमोजणीला सुरुवात झाल्यानंतर अवघ्या पहिल्या तासातच राजकीय चित्र स्पष्ट होऊ लागले आहे. प्रारंभीच्या कलांनुसार भारतीय जनता पक्षाने राज्यात भक्कम आघाडी घेतली असून बहुमताच्या दिशेने वाटचाल सुरू असल्याचे दिसत आहे. एकूण १२६ जागांपैकी सुमारे ६७ जागांवर भाजप आघाडीवर असून काँग्रेस आणि तिचे सहयोगी पक्ष मर्यादित जागांवरच पुढे असल्याचे चित्र समोर आले आहे.राज्यातील अनेक महत्त्वाच्या मतदारसंघांमध्ये भाजपचे उमेदवार आघाडीवर आहेत. सिसीबरगावमध्ये जीवन गोगोई, टिंगखोंगमध्ये बिमल बोरा आणि गोलाघाटमध्ये अजंता नेओग यांनी आघाडी घेतली आहे. तर पक्केबेताबारी मतदारसंघात काँग्रेसचे झाकीर हुसेन किकदार पुढे असल्याचे दिसत आहे. प्रत्येक फेरीसोबत मतमोजणीचे चित्र अधिक स्पष्ट होत असून सत्ताधारी पक्षाची पकड मजबूत असल्याचे संकेत मिळत आहेत.

 

 

 

दरम्यान, मतमोजणी सुरू असतानाच पक्षाच्या दिल्लीतील मुख्यालयात उत्साहाचे वातावरण पाहायला मिळत आहे. कार्यकर्त्यांसाठी खाद्यपदार्थांची तयारी सुरू असून सुरुवातीच्या अनुकूल कलांमुळे आनंदाचे वातावरण निर्माण झाले आहे. अंतिम निकाल जाहीर होण्यापूर्वीच साजरे करण्याची तयारी सुरू झाल्याचे चित्र आहे. मतमोजणी केंद्रांवर कडेकोट सुरक्षा व्यवस्था तैनात करण्यात आली आहे. केंद्रीय सुरक्षा दल, सशस्त्र पोलीस आणि राज्य पोलीस यांच्या तिहेरी बंदोबस्तात ही प्रक्रिया सुरळीत पार पडत आहे. निवडणूक आयोगाच्या सर्व नियमांचे काटेकोर पालन केले जात असून प्रशासनाने संपूर्ण प्रक्रिया शांततेत पूर्ण होईल असा विश्वास व्यक्त केला आहे. या पार्श्वभूमीवर आसाममध्ये पुन्हा एकदा हिमंत बिस्वा सरमा यांच्या नेतृत्वाखाली सरकार स्थापन होण्याची शक्यता व्यक्त केली जात असून राष्ट्रीय लोकशाही आघाडी पुन्हा सत्तेत येण्याचे संकेत प्रारंभीच्या कलांमधून मिळत आहेत.