तमिळनाडूत ‘विजय’ची दमदार एन्ट्री

Vijay in Tamil Nadu तमिळनाडू आणि पुदुचेरी येथील विधानसभा निवडणुकांची मतमोजणी सोमवारी सकाळपासून कडेकोट बंदोबस्तात सुरू झाली असून सुरुवातीच्या कलांमध्ये अनेक अनपेक्षित घडामोडी समोर येत आहेत. मतमोजणीच्या सुरुवातीच्या टप्प्यात चित्र सतत बदलताना दिसत असले तरी अभिनेता विजय यांच्या नव्या पक्षाला मतदारांचा चांगला प्रतिसाद मिळत असल्याचे दिसत आहे. पहिल्यांदाच निवडणूक रिंगणात उतरलेल्या विजय यांच्या पक्षाने अनेक मतदारसंघांमध्ये आघाडी घेतली असून ते प्रमुख स्पर्धक म्हणून पुढे आले आहेत. काही कलांमध्ये त्यांच्या पक्षाने आघाडी घेतल्याचे दिसत असताना, अण्णाद्रमुक आणि द्रविड मुन्नेत्र कळघम यांच्यातही जोरदार स्पर्धा सुरू आहे.

 

 

 

काही फेऱ्यांमध्ये अण्णाद्रमुक आघाडीवर असल्याचे चित्र होते, तर काही ठिकाणी विजय यांच्या पक्षाने आघाडी घेतली. द्रविड मुन्नेत्र कळघमलाही काही जागांवर वाढ मिळत असून तिन्ही प्रमुख पक्षांमध्ये काट्याची लढत पाहायला मिळत आहे. मतमोजणी पुढे सरकत असताना विजय यांच्या पक्षाने अनेक जागांवर मोठी आघाडी घेतली असून ते सर्वात पुढे असल्याचे संकेत मिळत आहेत.

 

 

दरम्यान, पुदुचेरीमध्ये राष्ट्रीय लोकशाही आघाडीने सुरुवातीपासूनच आघाडी घेतली असून काँग्रेस आघाडी मागे असल्याचे दिसत आहे. तेथेही मतमोजणी प्रक्रिया सुरू असून अंतिम निकालाकडे सर्वांचे लक्ष लागले आहे. मतमोजणी केंद्रांवर तिहेरी सुरक्षा व्यवस्था ठेवण्यात आली आहे. सकाळी आठ वाजल्यापासून सर्व केंद्रांवर मतमोजणीला सुरुवात झाली असून प्रथम टपाल मतांची मोजणी करण्यात आली. त्यानंतर यंत्राद्वारे नोंदवलेल्या मतांची मोजणी सुरू झाली आहे. संपूर्ण प्रक्रिया शांततेत आणि नियमानुसार पार पडत असल्याची माहिती प्रशासनाने दिली आहे. एकूणच तमिळनाडूमध्ये यावेळी तिन्ही पक्षांमध्ये तगडी लढत पाहायला मिळत असून अभिनेता विजय यांच्या पक्षाच्या दमदार कामगिरीमुळे निवडणुकीत नवा रंग भरल्याचे चित्र आहे. पुढील काही तासांत अंतिम निकाल स्पष्ट होणार असून राज्यातील सत्तेचे समीकरण ठरणार आहे.